A concellaría de Obras puxo onte en marcha a renovación do pavimento nun tramo da avenida de Vilagarcía
19 oct 2018 . Actualizado ás 05:00 h.As máquinas tomaron onte a avenida de Vilagarcía, un dos principais accesos á localidade de Cambados que, segundo explica o concelleiro de Obras, José Ramón Abal, atopábase moi deteriorado. Esta estrada foi cedida pola Xunta ao Concello e agora leste decidiu acometer as obras de renovación do pavimento, cun orzamento de 20.000 euros. Abal aproveitou a ocasión para informar de que xa ten listo o proxecto de asfaltado do acceso ás depuradoras de Tragove, un proxecto que leva anos sendo reclamada por estes empresarios. O cuadripartito decidiu, ademais, destinar 98.000 euros a esta obra, que debería licitarse antes de fin de ano.
Na avenida de Vilagarcía, as obras consistirán «no fresado da capa de rodaxe e no asfaltado dun tramo de dous mil metros cadrados», explicou Abal. Trátase do espazo comprendido entre a rotonda e o acceso á rúa Carreira. Unha zona que estaba moi deteriorada «e que estabamos reparando case cada mes», insistiu o edil. Explica que, ademais, esta estrada incrementou a cantidade de tráfico pesado que soporta, pois por aquí se desviaron os camións que antes pasaban pola avenida de Vilariño e que, por iso, esta obra facíase máis necesaria que nunca. A previsión de Abal é que os traballos rematen ao longo do día de hoxe. O luns, as máquinas desprazaranse á avenida da Coruña, onde está previsto tamén construír unha beirarrúa que bordee a igrexa de San Benito para mellorar a seguridade dos peóns.
Para rematar, Abal informou os avances no proxecto para asfaltar o viario de Tragove que dá acceso a unha decena de depuradoras de marisco. O Concello ten xa listo o proxecto, que ascende a 98.000 euros pois será preciso asfaltar 9.000 metros cadrados de terreo. A comisión de goberno xa autorizou o gasto e o diñeiro sairá da partida de 218.000 euros que se reservou para o convenio da praza de abastos. Se todo sae segundo o previsto, argumentou o edil de Obras, os traballos deberían estar adxudicados antes de fin de ano.