Estes mesmos traballos acometeranse noutras tres estradas de Vilagarcía
16 oct 2018 . Actualizado ás 05:00 h.Era unha das demandas do Concello da Illa, renovar unha das xuntas de dilatación da ponte. E é que o seu mal estado era tal que varios foron os vehículos que sufriron danos ao pasar por aí. A Xunta escoitou por fin as reivindicacións do municipio e onte mesmo comezaron os traballos. Non serán sinxelos, e obrigarán a cortar un dos carrís de circulación de forma alterna. Pero calcúlase que a finais da próxima semana, o viaduto contará cunha nova xunta de dilatación. Leste mesmo tipo de traballos acometerase noutros viarios de Vilagarcía. A Xunta actuará na PO-548 en Carril, na PO-305 no Pousadoiro e na variante norte. En total, investiranse 48.400 euros en renovar estas pezas.
«Decidimos agardar a que pasase a Festa do Marisco para acometer estas obras porque van causar algún tipo de molestias», explicou onte o delegado territorial da Xunta, José Manuel Cores Tourís. Os traballos comezaron onte mesmo e iso obrigou a pechar ao tráfico uno dos carrís de circulación, regulando o paso de vehículos na zona mediante semáforos.
A obra permitirá renovar por completo a xunta que se sitúa na parte da ponte máis próxima á Illa, pois a do outro lado cambiouse hai uns anos, cando se acometeron outras obras de mellora na ponte. Esta peza fora reparada con anterioridade, pero tras un cuarto de século soportando o tráfico, facíase preciso renovala por completo. Explican os técnicos da obra que, debido ás características do viaduto, esta é unha peza moi especial, «que soporta 75 centímetros de movemento», cando o normal é que esta distancia non supere os cinco centímetros. Por iso, demorarase durante sete ou oito días. A intención da empresa é a de traballar nun dos carrís de circulación de aquí ao xoves. Os traballos pararíanse durante a fin de semana e o luns retomaríanse de novo para actuar sobre o outro carril da ponte. Unha vez cambiada, esta peza debería durar entre doce e quince anos, dependendo do tráfico que soporte o viaduto.
Esta renovación finánciase con cargo a un proxecto que permitirá cambiar tamén as xuntas de dilatación doutros viarios de Vilagarcía, ademais de dous en Lalín . Explican os técnicos que na capital arousá as obras serán máis sinxelas, pois estas pezas non soportan tanto movemento como as da Illa. Nas próximas semanas, os operarios actuarán na PO-548 en Carril, nun viaduto que hai chegando á ponte do ferrocarril. Renovaranse tamén as xuntas da variante norte, a que leva a Carril. E actuarase, para rematar, na PO-305 xusto antes de chegar ao polígono industrial do Pousadoiro.