Baión acollerá a próxima semana a romaría de San Simón: haberá charanga, verbena e polbo, claro que si, para parar un tren
23 oct 2021 . Actualizado ás 05:00 h.«As enchentas de San Simón, antes ou despois son», di o refraneiro popular galego. A cita refírese ás posibles inundacións que acontecen nos primeiros días de novembro ou nos últimos de outubro, cando o río Umia decide recuperar parte dos seus dominios tras uns días de fortes choivas. Os prognósticos a longo prazo aventuran unhas xornadas de fortes precipitacións nos primeiros días de novembro, así que é probable que o refraneiro popular teña razón unha vez máis. Chova ou non, o que é seguro é que en Baión haberá unha enchenta de polbo a próxima semana, porque chegará a romaría de San Simón.
A de San Simón é unha cita ineludible xa non só para os veciños de Baión, senón tamén para os de toda a comarca e os seus arredores. Ir comer o polbo a Baión é case unha relixión; unha tradición que se mantén desde hai moitísimos anos e que, por fin, poderá celebrarse sen que a pantasma do estado de urxencia sanitaria ameace a súa discorrer.
Díxoo o alcalde de Vilanova, Gonzalo Durán, na presentación do programa de festas: «É a vida normal que levamos dous anos intentando recuperar», resumiu. Evidentemente, nos postos de polbo, que xa comezan a asomar, respectaranse todas as esixencias sanitarias que aínda son necesarias, como o uso da máscara ou a distancia.
As novenas da romaría arrincarán o día 27 e prolongaranse ata o 29 e o 31 será a misa solemne no campo da festa. Haberá charanga para animar o cotarro, e ata verbena, o día 30 coa Oca Band. «Eu non son moito de verbenas, pero dinme que é do mellor que podiamos traer», sentenciou Gonzalo Durán, que se congratulou de que volvan «as festas e as romarías».