O reguetón e o teatro convivirán nunha Romaría Viquinga que non sucumbe ao covid
AROUSA
No entanto, haberá que reducir a capacidade dos eventos a 400 persoas e a Milladoiro, Baiuca e Roi Casal haberá que gozalos sentados
25 jul 2021 . Actualizado ás 11:21 h.Durante a pasada semana tivo lugar, nas Torres do Oeste de Catoira , a presentación do programa preparado para a 61 Romaría Viquinga. Sin duda será unha edición diferente, marcada pola pegada do coronavirus, que un ano máis continúa sen dar tregua a esta festa. Desde unha das embarcacións onde se vai levar a cabo a travesía polo río Ulla ata a illa de Castrivello, a directora de Turismo de Galicia, Nava Castro Domínguez, acudiu ao acto para mostrar o seu apoio ao evento. Tamén asistiron o alcalde de Catoira Alberto García, o tenente alcalde, Javier César, e o portavoz do PP, Iván Caamaño.
Como cada ano, a celebración terá lugar o primeiro sábado e domingo de agosto. Durante os días previos á romaría, a localidade acollerá diversas actividades lúdicas e culturais. Apostando por un desenvolvemento seguro e de acordo coas restricións, os eventos preparados para este ano contarán cunha capacidade reducida a menos de 400 persoas. Ademais, como xa vén sendo costume, será obrigatorio permanecer sentados durante os concertos. O alcalde explicou a intención do Concello de apoiar a economía local e, para iso, programáronse actuacións de importantes músicos do municipio: Roi Casal, Baiuca e Milladoiro.
Roi Casal abrirá a axenda cun concerto no recinto das Torres do Oeste, a partir das 21.30 horas do domingo 25 de Julio . O venres 30, a alameda do Peirao acollerá o Valhalla Music Fest, un festival de reguetón para os máis novos que inclúe destacados cantantes do panorama musical nacional e internacional, como Danny Romero , Lennis Rodríguez ou Dasoul. A venda de entradas para este evento será a través da plataforma woutick.é
A tarde do sábado 31 e o domingo 1 pola mañá terá lugar un pasacalles organizado polo Séquito Viquingos, que cruzará a Rúa da Estación, con percusión e zancudos.
Unha das actividades típicas, que manterá a súa presenza este ano, será a Semana de Teatro coa representación da obra El-Rei Snie. A escola municipal Úrsula Teatro de Catoira preparou unha adaptación da peza que o grupo danés Vikingespil -composto por 200 veciños de Frederikssund, Dinamarca- representou en 1993 en Catoira, inaugurando a Semana de Teatro Romaría Viquinga de entón. A escenificación terá lugar durante os días 27, 28 e 29 a partir das 22 horas, tamén no escenario das Torres do Oeste.
Últimos días
O grupo Milladoiro, referente da música tradicional galega, non faltará na Romaría do 2021 cunha actuación o sábado 31 a partir das 22 horas, nun escenario situado diante do consistorio.
A modo de peche, o domingo 1 de agosto, día grande, a incursión da flota viquinga nas augas do río Ulla ata a Illa de Castrivello contará cunha actuación simultánea de Baiuca, que porá a banda sonora ao espectáculo desde as Torres do Oeste. Aínda que non haberá desembarco en terra -debido ás restricións que impón a pandemia- será posible seguir o evento mediante tomas aéreas que se realizarán desde as embarcacións a partir das 12.30, as cales se poderán visualizar a través das redes sociais do Concello.
A asistencia a todos os eventos -excepto o festival Valhalla- será gratuíta. Con todo será necesario reservar a entrada previamente para limitar as capacidades. As entradas poden solicitarse a través da web municipal catoira.gal ou na biblioteca da localidade.