A industria perde en febreiro o recuperado en xaneiro e eleva o paro un 0,9 % o último mes

As fortes restricións implantadas en Galicia pola Xunta por mor da terceira onda de covid-19 durante a práctica totalidade do mes de febreiro facían presaxiar malas noticias en materia laboral nunha comarca tan dependente do sector servizos como a que conforman os concellos do sur da ría de Arousa. Os datos achegados polos servizos públicos de emprego confirman os temores, excluíndo á zona do comportamento positivo no conxunto de Galicia, a única comunidade autónoma xunto a Euskadi e Estremadura onde baixou o paro respecto de xaneiro, cunha caída do 0,41 %. Con todo, o aumento do número de desocupados nas oficinas públicas de inserción laboral no Salnés atopou en febreiro a súa explicación non tanto no ámbito dos servizos, que tamén guindou datos negativos, como na industria, orixe principal das 99 persoas máis en procura de emprego, un +1,26 % ata as 7.962. Sumadas ás 853 dos tres concellos do Baixo Ulla, onde aparecen 19 parados menos (-2,18 %), elevan a 8.815 a cifra total de desocupados dos once municipios do sur de Arousa, 80 máis que os 8.735 anotados a 31 de xaneiro (+0, 92 %).

Un mes antes, o sector fabril tirara dunha baixada do 2,87 % do paro global rexistrado na zona, con 118 profesionais da industria menos nas listas das oficinas públicas de emprego; unha redución sectorial do 9,59 % ata os 1.112 desocupados entre o Baixo Ulla e O Salnés. O mes de febreiro engordou esta última cifra ata os 1.213, isto é, 101 parados máis, o que supón un incremento do 9,08 % na casa do sector secundario. Unha tendencia da que non escaparon nin a maioría dos municipios do Baixo Ulla cuxos mercados laborais, xunto ao de Meis (-7 parados para un total de 324 ao pechar febreiro), nadaron ao contraxeito o pasado mes. Así, Catoira, cun descenso de 4 desempregados para un total de 260, viu elevarse en 6 os seus traballadores industriais en busca de emprego e Valga nun tras mellorar o seu rexistro conxunto de parados en 14 persoas, ata as 362. Pontecesures, con 1 desocupado menos e 231 en total, mantívose plano no segmento fabril. 

Baixan campo, mar e construción

Curiosamente, e a pesar das férreas restricións á hostalería e restauración, o sector servizos apenas sinalou un repunte dun 0,4 % de paro entre O Salnés e Baixo Ulla en febreiro, con 24 persoas máis en busca dun contrato, suficientes certo é para volver pasar a cota dos 6.000 parados, ata os 6.012.

O resto dos grandes sectores produtivos, pola contra, ofreceron un comportamento positivo en materia de inserción laboral durante o mes pasado. Así, a agricultura e pesca viron reducir a súa bolsa de desocupados en 17 persoas, un 3,54 %, ata as 463, mentres a construción baixou en 21, un 3,37 %, mantendo a procúraa dun contrato a 602 profesionais na zona. Ademais, 525 veciños sen traballo anterior aparecen apuntados no servizo público de emprego, 7 menos que en xaneiro.

A nivel municipal, fronte aos catro casos xa referenciados en positivo, o paro rexistrado na comarca aumentou no mes de febreiro en 19 persoas en Cambados (1.143 en total), en 28 no Grove (1.089), en 7 en Meaño (419), en 5 en Ribadumia (341), en 13 en Vilagarcía (3.531), en 14 en Vilanova (805) e en 20 na Illa de Arousa (310 parados ao peche do último mes).

---

---

---