É un veciño de Sanxenxo, de 25 anos, que foi cusado de tráfico de estupefacientes
02 ene 2020 . Actualizado ás 05:00 h.Un veciño de Sanxenxo foi acusado dun presunto delito contra a saúde pública por tráfico de estupefacientes, segundo informa a Garda Civil de Pontevedra. Os feitos dos que se lle acusa tiveron lugar durante a tarde do pasado día 30, cando os axentes detiveron o vehículo no que viaxaba no transcurso dun control de estradas instalado no punto quilométrico 7.700 da PO-550, á altura do municipio de Meaño. No interior do coche atopáronse 541 gramos de marihuana que, engade a Garda Civil, podería ter como destino a venda, polo que se decidiu pór en marcha a correspondente investigación. O detido quedou en liberdade tras ser posto a disposición do xulgado de Cambados.
A operación levouna a cabo a unidade de seguridade cidadá da Garda Civil de Pontevedra (USECIC). O detido é un mozo sanxenxino de 25 anos que viaxaba de acompañante nun dos coches que se interceptou no mencionado control e que levaba escondida no interior do vehículo a marihuana dentro dunha bolsa de plástico, na que había 541 gramos desta sustancia. Segundo a Garda Civil, existían «indicios racionais que predeterminaban a venda como o posible destino da droga», motivo polo que se decidiu pór en marcha unha investigación na que se lle considera o presunto autor dun delito contra a saúde pública por tráfico de estupefacientes. Unha vez realizadas as correspondentes dilixencias, o detido quedou en liberdade coa obrigación de comparecer no Xulgado de garda de Cambados, onde se fixo entrega da droga intervida.