A cita do viño independente segue crecendo ao abrigo da praza de abastos de Vilagarcía
12 oct 2019 . Actualizado ás 05:00 h.Entre os seus dúas primeiras edicións, Castes pasou de contar con dez adegas a acadar o medio centenar. O proxecto que Sito Dieste alumou desde o Derby atopou o seu hábitat idóneo na praza de abastos de Vilagarcía, que poucas veces luciu como o fixo o ano pasado. Nesta terceira edición, que xa quenta motores, o número de adegueiros irase por amais dos setenta. Quizais non sexan os máis coñecidos polo gran público, pero si constitúen nomes de referencia para os amantes do viño. O núcleo de Castes, o salón independente do viño, é Galicia. E así seguirá sendo. Pero iso non implica que neste pequeno gran escaparate non poidan mostrar o froito do seu traballo profesionais que consenten a vide en Portugal , o Bierzo, A Rioxa, a ribeira do Douro, Francia, Italia ou Alemaña.
Vaian apuntando dúas datas: o 16 e o 17 de novembro. O contido da primeira aínda non se desvelou. En canto ao programa da segunda, un domingo, Dieste encargouse de presentalo onte xunto os concelleiros de Promoción Económica, Alba Briones, e Turismo, Álvaro Carou, que reafirmaron o compromiso do Concello de Vilagarcía cun salón que se axusta á cidade como anel ao dedo. Pola mañá desenvolverase o campionato internacional de cata por equipos. E entre as 12.30 e as 20 horas, a feira propiamente dita, en todo o seu esplendor. Pronto se desvelarán as primeiras adegas. Atentos.