As parellas inclínanse polas viaxes longas, mentres que as familias prefiren os destinos nacionais
21 ago 2019 . Actualizado ás 05:00 h.Coa entrada da segunda quincena do mes de agosto moitos españois preparan as súas maletas para gozar das vacacións de verán. Galicia é todo un luxo para pasar a época estival, pero o bo tempo nunca está asegurado. Os de fóra escollen a nosa comunidade para refuxiarse da calor e gozar do fresquito, pero son moitos os galegos que prefiren o sol e optan por escapar a outros destinos para recargar as pilas antes de comezar setembro e volver á rutina.
Os arousáns non son a excepción. A gran maioría continúa baseando as súas vacacións no turismo clásico en España: sol e praia. Para iso aproveitan as ofertas e conexións directas desde Santiago de Compostela e mesmo O Porto. Os destinos preferidos son as illas nacionais, Canarias e Baleares, con maior incidencia no caso do arquipélago canario, concretamente Tenerife, As Palmas, Lanzarote e Forteventura por orde de prioridade. No caso balear destaca Mallorca, o único destino con voo directo durante todo o ano.
En canto a voos internacionais, as tendencias apuntan tamén ás illas. Madeira, Cabo Verde e os Azores son tres das máis demandadas grazas á oferta cultural e a riqueza natural que posúen. Destaca tamén o Caribe, que continúa sendo un dos destinos en alza á hora de planear unhas vacacións de verán. Outra das opcións que comeza a repuntar é o turismo de cruceiros. As embarcacións deixaron de ser un luxo e convertéronse nunha alternativa máis alcanzable, polo que moitos arousáns recorren ao plan para aproveitar as súas vacacións. Un dos destinos que se atopa tamén en auxe actualmente é Croacia. Coas súas augas cristalinas as praias croatas son unha das alternativas cada vez máis escollidas para gozar da tempada estival. Ademais, o país posúe unha ampla oferta turística, perfecta para todos aqueles que busquen algo máis que sol e mar.
En familia ou en parella?
Fundamentalmente os arousáns viaxan en parella. Destinos paradisíacos como as illas caribeñas continúan repuntando ano tras ano entre os preferidos para as vacacións en compaña. Actualmente comezan a emerxer como tendencia algúns paquetes que ofrecen viaxes combinadas. Así as axencias abren a posibilidade de visitar Nova York e unha praia caribeña no mesmo período vacacional, sendo Riviera Maya e Punta Cana os destinos máis demandados polos seus areais. Outra das paraxes que se atopan en alza estes últimos anos é Tailandia. Atraídos polas súas espectaculares praias e os seus prezos económicos, os arousáns xa barallan o país asiático como unha das mellores opcións para gozar o verán nun ambiente completamente diferente ao que ofrecen outras illas europeas.
As preferencias cambian á hora de escoller destinos para viaxar en familia. Non sempre é doado adaptarse ás expectativas de todos os membros da casa: distintas idades e preferencias, datas inamovibles... os condicionantes son infinitos. Por iso, os mellores destinos son sempre os máis próximos. Os desprazamentos curtos lideran con vantaxe á hora de viaxar cos máis pequenos, especialmente os nacionais. O primeiro posto dispútase entre as illas Canarias e a costa española, pola comodidade e duración do traxecto. Os cruceiros tamén comezan a despuntar nas familias con fillos máis maiores, situándose como unha boa alternativa para gozar do verán coa comodidade de desfacer a maleta só unha vez en toda a viaxe.
A duración media da viaxe adoita ser dunha semana e en réxime de todo incluído, aínda que no caso dos desprazamentos máis longos pode chegar a estenderse ata as nove noites. O gasto medio varía moito dependendo do tipo de réxime co que se viaxa. As reservas feitas con maior antelación, entre xaneiro e marzo, tiveron un custo medio de 900 euros no caso de viaxes en parella. Á hora de viaxar con nenos o prezo depende das idades, roldando os 2.500 euros de gasto total en réxime de todo incluído.