O convoi, composto por quince colectores, tardou tres minutos en cruzar O Ramal
14 jun 2019 . Actualizado ás 21:15 h.Falar de trens en Vilagarcía é falar en serio. A inauguración da primeira liña de Galicia, que unía Cornes e Carril, en 1873. A súa prolongación ata Pontevedra, en 1899. O convoi cargado de gando que descarrilou nos anos 40 e guindou ao mar a un bo puñado. A inauguración da estación actual, en 1956. A recuperación do tramo inicial das vías portuarias, en 1997. As súas obras de extensión ata Ferrazo, concluídas no 2016. E o 14 de xuño de 2019, que figura xa na longa colección de cortes ferroviarias que atesoura a capital arousá. Boluda fretou unha composición de quince colectores, que entrou na historia da cidade e do seu porto a velocidade de paso humano, uns cinco quilómetros por hora, e tardou 19 minutos en completar os 1.300 metros que separan O Ramal do acceso ao recinto de actividade, xunto ao depósito de auga.
Quen puideron, e foron bastantes, arremuiñáronse pola mañá nas beirarrúas do parque Miguel Hernández, no cruzamento do Ramal, o punto máis delicado do percorrido, no parque do Cavadelo e, xeral, en calquera lugar que ofrecese unha boa vista sobre o mastodóntico ferrocarril. Non acadou os 450 metros que nun principio estaban sobre a mesa, pola sinxela razón de que varios colectores baleiros, que inicialmente ían viaxar ata Ferrazo, ao final foron descartados. Pero é difícil que alguén se sentise defraudado. «Cando era pequeno recordo xa ver o tren ao porto», rememoraba un veterano observador mentres seguía o perezoso camiñar da locomotora. «Tampouco foi para tanto, non pasou nada», respondíalle o seu compañeiro de faladoiro. Por non faltar, nin sequera faltaron aplausos. Vilagarcía, queda claro, sabe como recibir as novidades.
Os temores deste home, que apuntaban á interferencia do convoi coa circulación de vehículos, se esfumaron nos tres minutos e medio que o tren empregou en cruzar O Ramal, cuxo peche ao tráfico foi só parcial. A sucesión de tres rotondas obriga a secar o trazado que compoñen Rivero de Aguilar, O Centenario e a avenida Valle-Inclán, nos seus dous carrís máis próximos ao mar, que se foron abrindo por tramos a medida que os colectores se ían deslizando sobre os raíles.
Rostros de satisfacción entre os responsables de Boluda, o operador multinacional que conseguiu embarcar cara a Canarias un tren de mercancías procedente de Madrid. O recoñecemento da presidenta da Autoridade Portuaria, Sagrario Franco, ao seu persoal e á colaboración da Policía Local neste empeño. E no horizonte, a posibilidade disto repítase a miúdo e a naviera consolide un tren de frecuencia semanal.
O ferrocarril empregou 19 minutos en percorrer a distancia que separa O Ramal de Ferrazo
A conclusión a vinte anos de xestións e un investimento de 7,3 millóns de euros
Desde que, en 1997, José Luis Rivera Mallo recuperou os vellos raíles do peirao do Ramal, todos os presidentes da Autoridade Portuaria traballaron, en maior ou menor medida, na posibilidade que onte se materializou. Desde Manuel Bouzas e Benito González Aller a Javier Puertas, pasando por Jesús Paz e Javier Gago. Pero é baixo o mandato de Sagrario Franco cando o novo trazado esténdese ata a terminal de colectores de Ferrazo, grazas a unha obra en dúas fases nas que a institución investiu 7,3 millóns de euros.
A perspectiva de Boluda pasa por consolidar esta liña aberta con Madrid e atraer novos tráficos da contorna de Castela-León. O tren, aplicado ao tráfico de mercancías, necesita longas distancias para ser rendible. O seu crecemento, Renfe e os buques marcarán a súa frecuencia.