As vilagarciás estrean a segunda volta na pista do Celta
19 ene 2019 . Actualizado ás 05:00 h.Si parecía antes de comezar a competición que o Celta Zorka ía estar nas posicións punteiras da clasificación, pero era difícil de imaxinar que conseguise pechar a primeira volta de xeito inmaculado como así fixo. Trece partidos, trece vitorias. Ese é o balance ata agora do conxunto que prepara Cristina Cantero no grupo A de a Liga Feminina 2 e ao coco da competición é ao que visita o Cortegada esta tarde (Navia, 18.30).
O partido da primeira volta foi bastante igualado. A pesar de que a diferenza final se estirou ata os catorce puntos, o certo é que o Cortegada entrou no último cuarto sete abaixo e foi un apagamento ofensivo ao seu inicio o que decidiu o encontro. Aquel duelo xa deu pistas de como ía ser este Celta . Un equipo moi coral no que calquera integrante do quinteto que estea en pista é unha ameaza para o rival.
O Cortegada preséntase en Vigo instalado nunha boa serie de resultados, con tres vitorias consecutivas que lle permitiron escalar algún posto na clasificación e coa ilusión de achegarse á zona nobre da táboa. As vilagarciás preséntanse con ganas de dar a sorpresa ante o líder invicto e sabendo que terán que facer un partido practicamente perfecto para conseguir a vitoria ante un rival que é moi sólido. A pelexa baixo os aros e que as arousás estean sempre concentradas no xogo e non caian nalgún deses bajones que ás veces se lles presentan durante os encontros serán dúas das claves para que a vitoria veña a Vilagarcía.
Adrienne Motley é a máxima anotadora do conxunto vigués e a cuarta no ránking total da competición cunha media de 15,38 puntos. Tanto ela como Anne Sesosain sobresaen polo acerto que están a ter nos lanzamentos de tres puntos, dentro da boa tónica que, a nivel xeral, presenta o conxunto vigués. Catro das doce xogadoras con mellor porcentaxe da competición visten a camiseta do conxunto olívico.
Rubén Domínguez non terá baixas para o encontro desta tarde en Vigo, o terceiro oficial da tempada para ambos os conxuntos, que tamén se viron nun duelo de Copa Galicia que concluíu cunha rotunda vitoria do Celta .
O de hoxe será o primeiro dos tres derbis consecutivos que xogarán as arousás, posto que a próxima fin de semana visitará o pavillón de Fontecarmoa o Maristas Coruña e ao seguinte as de Rubén Domínguez terán como adversario ao Arxil en Pontevedra.