Tres intentos de asalto a tres negocios na mesma noite disparan a indignación en Carril
AROUSA
Dous individuos trataron de saquear a farmacia, unha cafetería e un restaurante en cuestión de horas
22 oct 2018 . Actualizado ás 05:00 h.«Isto é como unha ruleta rusa, xa tes metido no corpo o medo de que mañá ou pasado vaiche tocar a ti». Esta é a impresión coa que un veciño de Carril, propietario dun negocio, vaise á cama cada noite e onte explicitaba tras coñecer que tres establecementos sufriron o ataque dun par de individuos durante a madrugada do sábado ao domingo: «E isto -advirte- non é algo que só nos preocupe aos que temos unha actividade económica; é que poden entrar en calquera casa tamén».
A secuencia de asaltos golpeou á cafetería Petit & Fashion, un pequeno local que abre as súas portas na avenida Rosalía de Castro, moi preto do instituto Miguel Ángel González Estévez. Os seus autores non se andaron con demasiadas contemplacións e quixeron acceder ao interior do establecemento a través dunha das súas lúas, que golpearon ata conseguir crebala nun punto. A rotura, con todo, non foi o suficientemente ampla como para permitirlles o seu obxectivo.
Non moi lonxe, na propia Rosalía de Castro, abre as súas portas a farmacia de Carril. Tamén este negocio sufriu o ataque do par de energúmenos, que novamente quixeron esnaquizar un cristal para tratar de botarlle a man ao enreixado que protexía o acceso ao local. Tampouco nesta ocasión acadaron o seu obxectivo.
O restaurante Loxe Mareiro non gozou da mesma fortuna. Os saqueadores si lograron entrar no establecemento, situado na punta de Portugalete, onde o paseo marítimo se aproxima ao seu final. Para iso romperon unha fiestra e forzaron as súas contras. O botín foi minúsculo. Apenas algo de cambio. Pero os hostaleiros, que xa sufriron un episodio similar no verán, están fartos, do mesmo xeito que moita xente en Carril, onde a indignación crece paralela ao temor. As sospeitas recaen en dous tipos, enganchados á heroína, que pululan pola vila desde hai meses.