Na campaña 82/83, o cadro galego perdeu por unha diferenza de 81 (130-49)
19 oct 2021 . Actualizado ás 05:00 h.O Obradoiro xa ten que pensar noutra cousa. Debe esquecer de inmediato o forte golpe sufrido en Sar coa derrota ante o Murcia e fixarse única e exclusivamente no seu próximo obxectivo, o Real Betis de Pepe Pozas e Nick Spires, o sábado a partir da seis da tarde. O colectivo compostelán caeu en casa fronte ao rival máis antipático, contra un Murcia que tan malos recordos provoca na afección da capital galega. Perdeu, ademais, por unha contundente marxe. A diferenza ao final para os universitarios foi de 34 puntos, acadando os visitantes os tres díxitos no luminoso (70-104).
Foi a sexta vez que o Obradoiro encaixou cen ou máis puntos como local desde o regreso á máxima categoría do baloncesto español. Ata 27 veces na historia observaron os obradoiristas cen ou máis puntos no marcador final dos seus rivais. En 16 ocasións produciuse esta circunstancia na volta á ACB. Os outros 11 encontros foron naquel curso 1982/1983 no que o Obra acadou a liga das estrelas, na que só puido estar unha tempada. Aquel ano sufriron os galegos as maiores malleiras que lembra a inchada de Sar.
Non só o Murcia anotou cen ou máis puntos en Sar en éraa moderna do baloncesto. Tamén o lograron o Fuenlabrada (en dúas ocasións, ambas as con prórroga, 101-104 e 95-100), o Real Madrid (93-102), o Estudantes (112-116, tamén con prórroga) e o Valencia Basket (70-102).
Ademais do 70-104 do Murcia, outras derrotas soadas e que doeron moito foron as sufridas na pista do Tenerife (107-62), no campionato 2020/2021; contra o Barça no Palau (102-58), no torneo 2017/2018; e fronte ao Real Madrid na capital de España (106-59), no curso 16/17.
Amplas derrotas
Contra o Tenerife, Shermadini, con 18 puntos, foi un dos verdugos, ben apoiado polo escolta finlandés Salin, que converteu cinco triplos. Polo bando galego un dos poucos que se salvou do naufraxio foi o pivote de Connecticut Steven Enoch (15 puntos), hoxe no Baskonia.
Ante o Barcelona, nun desigual duelo con 46 puntos de diferenza, Pierre Oriola foi a figura, con 19 na súa estatística, os mesmos que anotou o escolta de Illinois Matt Thomas para os obradoiristas. Nos 47 puntos de marxe fronte ao Real Madrid, a dor de cabeza provocouno Jaycee Carroll, con 23 puntos e 6 de 7 triplos. A á-pivote húngaro Rosco Allen foi un dos poucos que se salvou do caos compostelán aquel día (19 puntos).
Pola contra, o Obradoiro só logrou unha vitoria centenaria en tan só seis ocasiones nos seus trece campañas na máxima división do básquet español. A máis soada foi no campionato 2014/2015, en Sar, ante o seu adversario máis antipático da Liga Endesa. Os de Moncho Fernández dobregaron ao Murcia por un escandaloso 104-52, co polaco Adam Waczynski (24 puntos e 5 de 6 triplos) e o mallorquino Alberto Corbacho (20 puntos e 4 de 9 triplos) en plan figura.
Outro triunfo de gran recordo foi o que conseguiron os obradoiristas con Curro Segura no banco. O Obradoiro-Joventut, con 29 triplos anotados entre ambos os contendentes, concluíu cun favorable 106-90 ante uns seis mil afeccionados na caldeira de Sar. Terry (23 puntos) e Vasileiadis (22 e 5 de 7 triplos) foron naquela data os principais protagonistas.
Tempada 82/83
Con todo, os marcadores máis escandalosos déronse na campaña 82/83 cando o Obradoiro fixo o milagre de subirse ao mesmo banzo dos xigantes do básquet español, un lugar ao que só tiñan acceso 14 clubs. En once dos vinte e cinco partidos que disputaron, os composteláns encaixaron cen ou máis puntos. Ao final foron pechacancelas, con só dous triunfos durante o curso (Valladolid e Caixa Ronda ).
Naquela travesía que durou ben pouco e na que se sufriron importantes contratempos, o Obradoiro recibiu malleiras de gran repercusión. Na pista de Sar perdeu de 55 puntos (70-125) ante o Real Madrid e de 50 (72-122) contra o Barcelona. Tamén caeu por unha marxe de 40 (75-115) no vello Sar fronte ao Zaragoza. Na pista do Real Madrid sufriu un amplo 100-63.
Con todo, a derrota máis soada da historia do Obra rexistrouse na cancha do Granollers, con triunfo dos cataláns por 81 puntos de diferenza (130-49). E iso que naquel campionato aínda non existían os triplos, que chegaron dúas tempadas despois. O partido no que se anotou o primeiro triplo da ACB foi o 23 de setembro de 1984, nun Estudantes-Canarias (88-80). Ese curso 84-85, tan só o 6,46 % das posesións dos equipos concluíron cun lanzamento triplo, case un recurso de luxo. Agora, na Liga Endesa tíranse unhas seis veces máis triplas que hai 35 anos.