O Obradoiro encara a visita ao inimigo que máis se lle resiste
ANDAR MIUDIÑO
O conxunto santiagués nunca foi capaz de gañar a domicilio ao Estudantes
09 may 2021 . Actualizado ás 17:09 h.O Monbus Obradoiro visita este domingo a un rival que se lle atraganta sempre cando xoga a domicilio. Nunca lle gañou en Madrid, a pesar de ter librado duelos de todo tipo e pelame.
O primeiro curso na ACB, con Curro Segura no banco, chegaba ao último partido da primeira volta con opcións de meterse na Copa. Caeu claramente, 90-66. A derrota máis ampla remite á tempada 17/18, 95-67. Tampouco lle foi ben ao equipo da 12/13, o que se acabou oitavo e foi capaz de vencer aquel curso lonxe de Compostela a todos os colectivos de ACB que xogaban a Euroliga: 89-66.
Fai cinco anos foi cando máis se achegou. Caeu por un só punto, 71-70, despois de que a Pepe Pozas escapáseselle unha bandexa e Jaime Fernández anotase desde o tiro libre a falta dun segundo.
Na última visita, na campaña 18/19, tamén estivo a un paso de romper a historia. Cedeu, 83-80, nun partido que pechou Darío Brizuela, autor dos últimos nove puntos do conxunto estudantil.
Viaxe e sesión no Magariños
Despois de xogar en Barcelona o xoves pola noite, a expedición santiaguesa trasladouse pola mañá ata Madrid e completou unha sesión de adestramento no vello pavillón Magariños.