O Obra afrontou o partido en Fuenlabrada con moitas incógnitas por resolver. Sempre hai dificultades engadidas para preparar un enfrontamento contra equipos que cambian tantos xogadores ao longo da tempada e que acaban de estrear adestrador. Con todo, había varias claves nas que incidir para aumentar as probabilidades de vitoria, a máis importante, sin duda, a capacidade de rebote ofensivo dos locais, sobre a que construíron máis da metade dos seus triunfos no que vai de liga. Nun equipo cun rendemento tan baixo por cada lanzamento de campo intentado, ter segundas oportunidades e poder ir frecuentemente ao tiro libre é esencial.
Fuenlabrada chegaba a esta xornada como o segundo equipo da liga con maior dependencia dos puntos achegados desde o tiro libre, case un 20 % da súa anotación conséguea desde a liña de 4,70. Se o Obra lograba limitar esta achega e controlaba rexéitelos defensivos, tería gran parte do camiño feito. Tras o rebote ofensivo e o tiro libre, a terceira clave do partido xa a sinalaba Moncho o xoves, a enorme capacidade física dos xogadores de Fuenla para defender as liñas de pase e anotar en transicións rápidas con facilidade. O Obra cumpriu no tiro libre e en rebote defensivo, conseguiu que só o 17 % dos puntos do rival chegasen desde os libres e capturou máis de 7 de cada 10 rebotes defensivos dispoñibles. O partido foise nas situacións que os locais lograron resolver en menos de 10 segundos de posesión, demasiados puntos doados para os fuenlabreños que levaron a vitoria noutro dramático final.