O xogador grego, que estivo en Sar en tres etapas diferentes, únese ás baixas xa confirmadas de Nick Spires e David Navarro
16 jul 2020 . Actualizado ás 15:52 h.O Obradoiro confirmou que o grego Kostas Vasileiadis (1984) non seguirá a próxima tempada no club. O veterano xogador estivo durante tres etapas diferentes en Sar. Nesta última fase, que durou dous cursos, Vasileiadis disputou un total de 41 partidos, non podendo render ao máximo nivel na campaña recentemente finalizada por unha longa lesión. Na 2015-2016, participou en catro encontros, chegando ao final da competición para botarlle unha man ao equipo. A súa primeira experiencia no Obra foi no exercicio 2009-2010. O grego xogou 25 partidos. Nestas tres fases, Vasileiadis vestiu en 70 ocasións a camiseta do conxunto da capital de Galicia.
O aleiro grego, que deixa o equipo de Moncho Fernández con 36 anos de idade, ten un longo percorrido pola Liga Endesa, despois de xogar tamén no Tenerife, Unicaja Málaga e Bilbao Basket, once tempadas nas que saltou ás pistas da ACB nun total de 270 ocasións.
Ademais da marcha de Vasileiadis, o Obradoiro confirmou durante estes días que Nick Spires e David Navarro tampouco seguirán en Sar. Spires pechou así un ciclo de tres tempadas e 71 partidos como obradoirista. Para Navarro tamén foron tres cursos e 82 encontros.
O Obradoiro, que nos próximos días confirmará máis baixas no seu cadro de persoal, conta nestes momentos con cinco xogadores en nómina. Chris Czerapowicz, Álvaro Muñoz e Laurynas Beliauskas teñen contrato en vigor e o capitán Pepe Pozas renovou o seu compromiso coa entidade de Sar. A quinta praza no vestiario é para o base turco Kartal Ozmizrak, en espera da confirmación oficial da contratación do lituano Laurynas Birutis.
Agora, o Obra está moi pendente do dereito de tenteo con Deixan Kravic, despois de perder a outra das súas estrelas tras a marcha de Vladimir Brodziansky ao Joventut de Badalona.