Recoñezo que, máis dunha vez, tiven que consultar o regulamento da ACB para ver se era obrigatorio atacar a partir dun bloqueo directo. É un recurso que non me entusiasma, retarda o ataque e atrae xogadores á zona do balón. O Obradoiro xoga máis sobre pase e movemento de xogadores sen balón, pero tampouco somos máis papistas que o Papa nin pretendemos emendarlle a plana aos da capital. Non somos deses, non, nin andamos por aí dándonos pisto. Con McConnell xogabamos bloqueos directos e, se a lectura do ataque requíreo, é unha solución máis entre a gran cantidade de respostas que ten o equipo interiorizadas para opor a cada acción que propón o rival. Esa riqueza táctica (non tanto por volume de sistemas como por volume de solucións, en ataque e en defensa) converte nun suplicio preparar un partido contra Moncho. Iso si, en rolda de prensa queda mellor dicir que o Obradoiro xoga diferente que comentar que é un equipo moi pesado para calquera rival.