A cancelación de Korn e a choiva non impediron unha xornada final apoteósica
04 jul 2022 . Actualizado ás 05:00 h.«Levamos toda a semana a lume de biqueira. Oxalá o Resu durase todo o mes». O comentario onte do propietario dun coñecido establecemento hostaleiro de Viveiro é un sentir case unánime na cidade. Supermercados, diversos comercios, bares e restaurantes se lucraron do desembarco dunha marea de miles de fans que volveron converter a cidade na capital mundial do metal, punk e hardcore tres anos despois.
A pesar das múltiples dificultades, o Resurrection Fest Estrella Galicia 2022, o máis grande e difícil desde que comezou a celebrarse no 2006, pechouse cun maioritario bo sabor de boca para quen gozaron de cinco días de desenfreo e para quen os recibiron. A choiva que condicionou a xornada do domingo e a cancelación á primeira hora da mañá da actuación de Korn foron a metáfora perfecta das dificultades para sacar adiante unha edición máis xigante que nunca, con máis días, ata 120 concertos nos catro escenarios e 140.000 entradas vendidas e máis de 30.000 espectadores diarios desde o xoves ao domingo.
A maioría deles repetían, atraídos polo cartel e os atractivos de Viveiro, e xa compraran os seus billetes antes de que a pandemia obrigase a cancelar a edición do 2020. Para entón, o gran cabeza de cartel anunciado era System of a Down. Cando se reconfiguró a axenda, Avenged Sevenfold estaba chamado a ser o gran protagonista. Ningún dos dous puido estar en Viveiro. Logo caéronse Madball, Spiritbox e, a poucas horas de actuar onte, Korn.
«Foi o ano máis complicado de todos en canto a loxística e transportes», admitiu unha organización que aínda así ofreceu cinco xornadas apoteósicas con Deftones, o 50 aniversario de Judas Priest, Sepultura, Rise Against, o brutal espectáculo de Sabaton, Gojira e Crossfaith, entre outros moitos.
Un Resu colorido
Os tons negros que durante toda a semana tinguiron a cidade de Viveiro e os seus arredores, con varias zonas de acampada e os concertos en Celeiro , deron paso a un colorido total onte. A choiva non impediu que seguise a festa, foi un aliciente máis que as decenas de miles de fans que aproveitaron o festival ata o final atoparon a forma de gozar, pero si obrigou a vestir chubasqueros e roupas de auga de múltiples cores. O ambiente durante os shows de Electric Callboy, un dos máis gozados o domingo, a irreverente Froitería Toñi ou o último gran cabeza de cartel, Bring Me The Horizon, xa de madrugada, deixaron os últimos grandes sons e imaxes deste Resurrection Fest en Viveiro.
Os organizadores, obrigados a reconfigurar todos os horarios do día pola baixa
«Estamos devastados por esta noticia. Tras ter cambiado toda a programación do festival para este domingo para poder salvar o concerto da banda, o infortunio quixo xogarnos unha nova mala pasada», lamentou o Resurrection Fes á primeira hora da mañá. Tras adiantar o seu concerto ás 16.15 por un problema co voo de volta, finalmente cancelárono «por unha vería no seu avión privado» que lles impediu desprazarse desde «o lado de Europa». «Fixemos todo o posible, pero ás veces todo o posible non é suficiente», lamentaron uns organizadores que se viron obrigados a modificar todos os horarios de concertos no Main Stage coas súas portas xa abertas e recibiron algunhas críticas, pero tamén apoios.
