A hostalería, pechada, só pode ofrecer comida ou café para levar ou a domicilio
21 ene 2021 . Actualizado ás 18:47 h.Desde esta pasada medianoite Viveiro está xa en nivel extremo de restricións para tratar de controlar os casos de covid. Mantense o peche perimetral neste concello no que este xoves se rexistran 267 casos activos de coronavirus, un menos que hai vinte e catro horas, segundo confirmou o Sergas con datos do mércores ás 18.00 horas. Pouca xente esta mañá desapracible ademais polas rúas.
Que se pode facer? A hostalería está pechada, completamente, tamén terrazas; só se permite servizo de comida a domicilio (ata as 00 horas) ou ben para levar (hai que ir recollela antes do toque de queda).
Ximnasios, piscinas, pavillóns deportivos e campos de xogo, tamén deberán estar pechados. Queda anulada toda actividade cultural. No caso de Viveiro os multicines xa estaban pechados. Pecha tamén o teatro Pastor Díaz e a biblioteca. Pechan as ludotecas -lecer infantil- e os salóns de xogo e apostas.
Só convivientes
Moi importante, talvez o máis importante: só se permiten reunións de persoas convivientes.
Doutra banda, os desprazamentos en vehículos privados dentro do territorio municipal tamén se limitan a convivientes, polo que está prohibido, por exemplo, que unha persoa leve no seu coche ao colexio ao fillo dun veciño. Tamén están autorizados os desprazamentos a municipios limítrofes, como Ourol e O Vicedo, para coidar hortos ou animais.
Desde o Concello de Viveiro informaban ademais que «pechamos tamén os centros socioculturais e locais sociais municipais».
«En todos os espazos públicos de titularidade municipal prohíbese a permanencia de grupos de persoas non conviventes. Esta limitación non será aplicable no caso de actividades laborais, institucionais, empresariais, profesionais, sindicais, de representación de traballadores e administrativas, actividades en centros educativos, de formación e ocupacionais, sempre que se adopten as medidas previstas nos correspondentes protocolos de funcionamento».
«Lémbrase, ademais, que se pechan os baños e parques públicos e a suspensión das actividades deportivas, culturais, congresos, conferencias, reunións, ou calquer outro tipo de evento ou actividade que estivese previsto levar a cabo en instalacións municipais mentres dure este estado de nivel extremo», sinala a alcaldesa María Loureiro.
O comercio pode permanecer aberto, tamén os centros educativos e hai mercados
O comercio tradicional pode permanecer aberto aínda nesta situación, iso si, coa capacidade limitada ao 50% e cumprindo con todas as medidas. Tamén se celebrarán os mercados tradicionais (coas mesmas restricións en canto a capacidade, distancias e uso de máscaras).
Os centros educativos continuarán abertos, salvo a escola infantil (gardería municipal) que permanece pechada por prevención este mes por orde do concello tras varios casos de covid nunha aula.
Explicábao a alcaldesa viveirense: «As novas medidas e limitacións establecidas pola Xunta de Galicia non afectarán ao comercio, que pode permanecer aberto co aforo limitado ao 50%. Da mesma maneira, mantense a celebración dos mercados. Finalmente, lémbrase que se continúa mantendo o peche perimetral e o toque de queda ás 22.00 horas. Dende o goberno municipal pídese os veciños e veciñas de Viveiro a máxima prudencia e o estrito cumprimento das medidas establecidas para superar o antes posible esta complicada situación».
Non hai un tempo determinado para estas medidas
O conselleiro de Sanidade, Julio Comesaña, chamou onte á alcaldesa viveirense; explicoulle que non hai un tempo determinado de duración para o nivel extremo no que está Viveiro, dependerá da evolución do covid; poderían ser 7-10 días se vai ben.
OPINIÓN: Convivientes
É talvez a medida máis importante para frear o virus; tamén a máis complicada: só se permiten reunións entre convivientes. Ninguén máis, neste período excepcional. De cumprirse, Viveiro terá que baixar considerablemente os casos de covid. Ata agora non se conseguía aínda estando en nivel máximo alto de restricións, o cal evidencia, claramente, que non se estaban cumprindo como se debía. Simplemente. A irresponsabilidade duns págana sempre todos.