En establecementos como Adegas Ribeirao, en Viveiro, conciertan citas previas para preparalas
11 dic 2020 . Actualizado ás 09:46 h.Coa mobilidade restrinxida entre comunidades e mesmo entre un bo número de poboacións galegas, e o temor aos contagios de coronavirus sobrevoándoo todo, o 2020 vai camiño de ser un ano idóneo para regalar cestas do Nadal aos seres queridos ou aos compromisos. «Antes a cesta só se regalaba polo Nadal, pero agora xa se converteu no regalo perfecto, en algo que a xente aprecia de verdade», expón a encargada de Adegas Ribeirao en Viveiro, Olalla Casas. O negocio que dirixe ofrecerá ata mediados de decembro unha promoción especial co 10% de desconto nas súas cestas para evitar compras de última hora e garantir que a tenda disporá da mercancía que demande o cliente.
Tamén para evitar colas e apuros nun ano marcado case de principio a fin pola pandemia do covid-19, o establecemento brinda aos seus clientes a posibilidade de concertar unha cita previa para deseñar as cestas ao seu gusto. Incluso fose do horario comercial. A meta, segundo relatan, é garantir que os agasallos se monten «cunha pouca de tranquilidade», sen présas.
En canto aos produtos que se poden incluír nestes presentes destacan os alimentos autóctonos ou con denominación de orixe. «Calquera produto de Galicia que podas meter nunha cesta vai gustar», apunta Casas, que comenta que a estas alturas xa recibiron os primeiros encargos. «Xa temos demanda, temos unha clientela moi fiel», abunda.
Na listaxe de alimentos e bebidas con máis tirón destacan neste momento os viños espumosos elaborados con uva albariño, pero tamén as conservas, os patés, os queixos ou as marmeladas. «Todo ten boa acollida», subliña.
Máis calidade e menos volume
En canto aos prezos destes lotes, o abano é variado, pero a partir de 40 euros é posible regalar unha cesta do Nadal en condicións. «As cestas dependen do presuposto do cliente. Nós traballamos produto gourmet e non facemos tanto a cesta de volume como a de calidade, aínda que se o cliente a quere pódese montar. Pode escoller máis bulto e menos cartos, ou algo máis fino... O que nos diferenza é a atención personalizada», sinala.
E con respecto ao tipo de clientes que máis as demandan hai empresas e particulares. «O perfil é moi amplo», sinala a responsable en Viveiro dunha firma que está especializada en viños e en licores. Outro dos puntos que xoga a favor é que realizan envíos a todo o territorio nacional e ás illas cunha axencia de transportes.
«Calquera produto de Galicia que podas meter nunha cesta de Nadal vai gustar sempre. Neste momento, por exemplo, está gustando moito o viño espumoso galego, tipo cava, feito de uva albariño na maioría dos casos», Olalla Casas, encargada da tenda de Adegas Ribeirao en Viveiro
Jorge Díaz, Distribucións Jorla (Viveiro): «Apostamos polos produtos de quilómetro cero en turróns, meles ou conservas»
Conta Jorge Díaz, propietario de Distribucións Jorla, de Viveiro, que no ano do coronavirus algunhas empresas mariñás invisten máis diñeiro nas cestas de Nadal dos seus empregados porque non van poder organizar ceas. Segundo relata, outras manteñen a tradición de regalar lotes por estas datas pero víronse obrigadas a recortar gastos, e algunhas non as están encargando. «Para uns foi un ano bo, pero a outros foilles mal e a outros regular», explica o empresario, que acaba de abrir unha tenda gourmet dentro das instalacións que dirixe na estación de ferrocarril. Aínda que o produto estrela son os xamóns e as paletas -aí levan a palma os salmantinos Joselito-, Jorla está a intentar que a maior parte dos alimentos que levan as cestas sexan «de quilómetro cero» para apoiar a produtores locais. Por iso é polo que, aínda que tamén ofrezan produtos de importación, aposten polos turróns que fabrica a Pastelería Vale, os meles que cultivan apicultores da zona ou as conservas que se fabrican na comarca, como Conservas Ares. Os prezos: de 50 a 1.500 euros.
Francisco Chao, de Casa Chao (Viveiro): «Estamos facendo cestas de Nadal desde cincuenta ata tres mil euros»
As conservas artesás Rubén 1964 impulsadas por Peixes Rubén, o café ecolóxico de Cafés Candeas e os chocolates Costiña, elaborados no Retiro dá Costiña, un restaurante de Santa Comba con estrela Michelín, pero tamén os patés ecolóxicos Pan do Mar, ou o foi de pato da empresa de Vilardevós (Ourense) Ánades son algúns dos produtos que «están pegando moito» nas cestas de Nadal que elabora neste 2020 Casa Chao, en Viveiro. O seu responsable, Francisco Chao Pino , explica que algunhas empresas optaron por substituír as tradicionais comidas e ceas de empresa, que como consecuencia da pandemia están moi limitadas, por cestas. «No noso caso non estamos vendo mermada a venda nese aspecto», indica, e sinala que o abano de prezos é tremendamente amplo. «Estamos facendo cestas de Nadal desde 50 euros ata 3.000», conta, e detalla que estes obsequios se compoñen a medida do cliente. O habitual é que leven produtos típicos de Nadal, embutidos, viños e espumosos, destilados, conservas, e agora tamén panetone.
Paula Cao, Vinoteca Fumarel (Ribadeo): «Cada cliente pode elixir de xeito personalizado os produtos da súa cesta do Nadal»
A Vinoteca Fumarel de Ribadeo empezará estes días a tempada máis forte de confección e venda de cestas do Nadal, como comenta a encargada de tenda, Paula Cao. Destaca que todos os lotes se elaboran de xeito personalizado e a gusto do cliente, e que os produtos gourmet son os máis demandados. No apartado doce inclúen este ano os chocolates Costiña, así como as Maruxas de Nata ou as afamadas galletas asturianas Moscovitas, de améndoa e chocolate. «O ano pasado empezamos a traballar cos turróns de Rialto, unha confeitería de Oviedo», sinala Cao, que tamén destaca o gran atractivo da selección de viños envasados coa marca Fumarel.