As fochas reaparecen coas choivas nun xardín reconvertido en aparcadoiro
20 novs 2019 . Actualizado ás 05:00 h.Todos os anos desde principios desta década, en canto chove durante uns días, reaparece en Viveiro o que xa se coñece como «territorio fochancas». Numerosas fochas, moitas veces cubertos por auga, converten nun suplicio para peóns e automóbiles transitar por un espazo público paralelo á chamada variante.
De momento non hai solución duradeira, nin se agarda a curto prazo, para un problema repetidamente denunciado por comunidades de veciños e donos de establecementos comerciais situados na mazá de edificios do 35 ao 41, na avenida de Ferrol. Parches si, porque cando as protestas aumentan aparecen tapados os cráteres dunha zona destinada a xardín reconvertida na rúa e aparcadoiro.
Agora é o PP viveirense o que advirte do «inadmisible estado» dunha zona onde «non é descartable que se produza a caída de peóns». Segundo o concelleiro Óscar Rodríguez, líder dos populares viveirenses, «unhas cen familias padecen vos inconvenientes do abandono» dese tramo da zona de Verxeles.
«Incómodo e ata perigoso»
Como é «realmente difícil, incómodo e ata perigoso» camiñar ou circular por esa «chaira, tamén utilizada como aparcamento», Rodríguez empraza ao goberno socialista local a «aclarar a quen pertence» e a demandarlle que o arranxe. Se o titular non o repara, o PP cre que o Concello «deberá estudar a posibilidade de executar as melloras precisas e pasarlle a factura a quen sexa ou doo».
Un xardín de Costas
Con documentos, residentes na contorna do «territorio fochancas» lembran que no 2010 unha promotora anunciaba edificios con «unha zona exterior axardinada, sen vehículos e sen proxecto de viario». Ao ano seguinte era un prado con algunhas árbores, sen mobiliario e sen urbanizar. No 2014 construíronse beirarrúas e converteuse nunha rúa asfaltada, con acceso a garaxes, e en aparcadoiro.
Distintas fontes confirman que o Concello permitiu edificar a cambio de que os promotores dedicasen a zona verde dotacional un espazo outra vez infestado de fochas. Prevían unha rúa polo extremo oeste do edificio, perpendicular á variante, que continuaba paralela á fachada posterior. Que o «territorio fochancas» pertence a Costas próbao que o Concello lle solicitou no 2012 a concesión do terreo para destinalo a zona peonil. Segundo fontes municipais, a normativa urbanística trazaba unha rúa.
O remedio tardará aínda máis
De manterse os criterios de principios deste ano, Costas inclínase por prescindir da rúa e do aparcadoiro. Avalado por un informe topográfico elaborado pola Deputación de Lugo, o Concello trataría de combinar o espazo axardinado e peonil cun viario de paso de vehículos. Similar sería a formulación dos promotores dos edificios, que publicamente non se pronunciaron.
Para a alcaldesa socialista María Loureiro, o remedio definitivo «é moi necesario», pero aínda se demorará máis porque o Concello debe compaxinar as indicacións de Costas coa licenza dos edificios e o contexto urbanístico actual.