González-Páramo, conselleiro executivo do BBVA, é confrade do Nazareno dous de Fóra
16 feb 2019 . Actualizado ás 13:07 h.«De familia moi vinculada a Viveiro» e membro da Confraría do Nazareno dúas de Fóra, José Manuel González-Páramo é conselleiro executivo do BBVA e presidente para Europa do TransAtlantic Business Council, o único órgano oficial de consulta sobre as relacións comerciais e de investimento recoñecido polos EE.UU. e a UE. A súa carreira profesional acredítao como un gurú da economía, unha recoñecida autoridade mundial que pregoará a Semana da Paixón de Viveiro no 2019.
Madrileño de nacemento, contan quen que tratan ao prestixioso economista que Viveiro é unha referencia nos seus sesenta anos de vida. Como un cidadán máis, se oxigena na localidade cando a súa apertada axenda permítello. Probablemente os seus lazos con Viveiro serán o fío condutor do seu pregón, que pronunciará o 13 de abril.
Unha dilata carreira profesional
Porque «unha boa elección sempre contribúe a engrandecer e dignificar» a Semana Santa Internacional de Viveiro, a Xunta de Confrarías «séntese satisfeita» porque teña aceptado a súa proposta de abrir oficialmente a Semana Santa Internacional.
«Unha combinación de postos de responsabilidade en política monetaria e banca central, e no sector privado, así como experiencia académica e actividade de asesoramento», balizan a dilatada carreira profesional de José Manuel González-Páramo.
Doutor e dobre máster en Economía pola Universidade de Columbia, Nova York, e licenciado e doutoramento con Premio Extraordinario na Universidade Complutense de Madrid, desde o 2015 é académico da Real Academia de Ciencias Morales e Políticas. Das súas numerosas distincións, no currículo difundido pola Xunta de Confrarías citan, entre outras, a Medalla Carlos V da Cámara de Comercio Xermano-Española ou o Premio Institut D'Estudis Financers á Excelencia Financeira.
Con 29 anos sucedeu a outra figura da economía como Fuentes Quintana na cátedra de Facenda Pública da Complutense de Madrid e tamén impartiu cursos avanzados en distintos centros académicos españois e profesor extraordinario na IESE Business School.
Bancos de España e Europeo
O próximo pregoeiro da Semana da Paixón de Viveiro tamén exerceu distintos cargos no Banco de España e no Banco Central Europeo. No 2013 foi nomeado membro do consello de administración do BBVA, onde como conselleiro executivo exerce de chief officer, Global Economics & Public Affairs, e preside o consello asesor internacional da entidade. Tamén preside a European DataWarehouse GmbH, «a primeira iniciativa europea que desde o sector privado responde á necesidade de dotar aos mercados de titulización de estándares elevados de transparencia».
Cando o 13 de abril suba ao escenario do Teatro Pastor Díaz para ler o pregón, probablemente fará unha chiscadela á Confraría do Nazareno dúas de Fóra, á que pertence. Agrupa a viveirenses de nacemento ou sentimento, que cada Xoves Santo participan na Procesión do Prendimiento. Se o tempo non o impide, sae ás dez da noite, da igrexa de San Francisco, cos pasos O Prendimiento, O Calvario, Santísimo Cristo da Piedade e María ao pé da Cruz.
Como manda o que xa é tradición na Xunta de Confrarías que preside José Veiga, a José Manuel González-Páramo presentarao o pregoeiro do ano pasado, Luis de Carlos Bertrán, familiarmente ligado a Viveiro e reputado profesional da avogacía.
Outros pregoeiros relevantes
Desde 1974 ata o 2018, a Semana Santa de Viveiro contou como pregoeiros con figuras relevantes en diferentes ámbitos. Entre elas, cabe citar Ramón Otero Pedrayo (1974), José Filgueira Valverde (1976), Manuel Fraga Iribarne (1977), Enrique Cal Pardo (1983), Ramón Pernas López (1989), José Ramón Ónega López (1993), José Ramón Gayoso (2000), Ana Pastor Julián ((2003), Antonio Abril Abadín (2011), Luz Pozo Garza (2012) ou Antonio María Rouco Varela (2015).