1984
11 feb 2019 . Actualizado ás 12:58 h.Viveiro (Por J. Fariñas). A Sociedade Casino de Viveiro convocou para o vindeiro sábado, ás seis da tarde en primeira convocatoria e media hora máis tarde en segunda, unha asemblea xeral extraordinaria para someter a ratificación a proposta acordada na xunta ordinaria celebrada o pasado sábado de aumentar en dez mil pesetas a cota de ingreso de socios, o que suporá unha recadación duns dez millóns de pesetas entre os mil membros con que conta actualmente dita entidade, para poder afrontar os compromisos económicos pendentes da construción do novo edificio social. Na xunta da pasada fin de semana tamén aprobaron concederlles voz e voto ás mulleres, que a partir do próximo ano pagarán unha cota normal de socio. A decisión recolleu unha salva de aplausos das mulleres asistentes á asemblea.
Na asemblea foi aprobada a memoria e balance, á vez que a directiva deu conta das actividades realizadas en diversos campos, de cuxo contido xa adiantamos información na pasada semana. Entre os proxectos inmediatos presentaron a construción da pista de tenis, unha próxima entrevista co conselleiro de Turismo e a petición de colaboración dos socios para que se constitúan en comisións organizadoras de actividades, que ía directiva coordinará e impulsará.
Houbo unha proposta, aceptada por aquiescencia, para nomear socios de honra aos membros da directiva actual, en recoñecemento dos seus esforzos e labor para pór en marcha a nova sede así como outras realizacións. Nomearon para o cargo de secretario a Eduardo Lorenzo Vilar e o que deixa devandito cargo pasa a cubrir unha vacante de vogal.
A proposta máis polémica foi a do aumento de dez mil pesetas nas cotas dos socios, que de corenta mil pasará a cincuenta mil, sobre o que houbo diversas opinións, con mención a que os asistentes non representaban aos mil socios.