Nova pensión de dúas estrelas en Ribadeo con encanto: «Comezamos a pleno rendemento pouco antes do Ribadeo Indiano»
RIBADEO
A familia que xestiona o aloxamento, chamado Silvent, nun edificio de 1902, é sucesora do famoso titiriteiro Barriga Verde
19 jul 2025 . Actualizado á 05:00 h.Todo estaba a punto na nova Pensión Silvent de Ribadeo o pasado 4 de xullo para abrir as súas portas ao público. Non soamente a apertura oficial foi no verán xa instalado no calendario, senón que á semana seguinte estaba marcada unha cita local emblemática que atraeu a miles de persoas á vila: o Ribadeo Indiano. Unha estrea en grao sumo potente. Así describe Francisco Silvent Villalba, socio do establecemento onda a súa nai María José Vilalba Bello, como foron eses primeiros días de andaina no novo aloxamento turístico ribadense: «Comezamos a pleno rendimieno. Aínda que tivemos unha adaptación apresurada, resultou moi ben. Sorprendeunos porque tivemos moita afluencia de xente de fóra de España. Tivemos visitantes de Alemaña, de Holanda e de Francia, a parte do turismo nacional. Para uns quince días que levamos abertos é bastante exponencial». A filosofía indiana impregna arquitectónicamente o edificio, pois o ano de construción é 1902.
Contan con oito cuartos dobres e unha tripla, amplas e acolledoras. É dicir, unha capacidade para unha vintena de hóspedes. É unha pensión de dúas estrelas que ofrece entrada sen contacto e nos cuartos a clientela pode gozar dun almorzo de cortesía con café de cápsulas, bolería e galletería e dispor de auga fría na neveira, «todo iso de forma gratuíta», salienta. «Queremos atender o público o que necesite, pero que poida entrar e saír cando eles queiran, incluso facer o check-in en liña», engade. «Nesta zona está a intentarse implementar este sistema porque é unha forma de que a xente poida entrar e sair cando queira, tras pasarlle ao cliente o código», finaliza.
A localización da Pensión Silvent é outro factor para ter en conta, pois se sitúa a 200 metros das praias ribadenses de Illas e Vos Castros e a un quilómetro dAs Catedrais, aproximadamente. Con respecto ao que queda de verán, indica que «estamos practicamente completos, porque a xente está a reservar mái a último momento». A web é www.pensionsilvent.com. O apelido Silvent, que dá nome á pensión, non pasa desapercibido porque o seu bisavó formaba parte da famosa compaña Barriga Verde que introduciu en Galicia os monicreques «e tamén ían polos pobos con cine», lembra.