Cinco anos de cárcere para un adestrador de fútbol sala de Ribadeo por abusar dunha das xogadoras menor de idade
RIBADEO
Na sentenza indícase que o home agora condenado, de 60 anos, iniciou un achegamento sexual prevaliéndose da súa superioridade como referente da menor cando esta tiña 15 anos
23 oct 2020 . Actualizado ás 17:41 h.A sección segunda da Audiencia Provincial de Lugo condenou a cinco anos de prisión e outros cinco anos de liberdade vixiada ao adestrador dun equipo de fútbol sala de Ribadeo, por abusar sexualmente e de forma continuada dunha das súas xogadoras. O home agora condenado ten 60 anos de idade e xulgáronse feitos que se iniciaron no ano 2015, cando a vítima tiña 15 anos. Ademais, a Audiencia halle imposto a prohibición de comunicarse e aproximarse á moza durante seis anos, así como a inhabilitación durante cinco anos para calquera profesión ou oficio que implique contacto regular e directo con menores.
Segundo información do departamento de comunicación do TSXG, o tribunal considera acreditado que o acusado iniciou un achegamento sexual cara á menor en xullo de 2015, “prevaliéndose da súa superioridade, ao ser adestrador e referente masculino da menor”. O condenado continuou cos abusos, que levaba a cabo no seu vehículo e en lugares de pouca luz e escaso tránsito, polo menos ata xaneiro de 2017, segundo a sentenza.
A vista celebrouse en setembro e nela o home agora finalmente condenado negou os feitos, asegurando que mantiña coa vítima unha relación de amizade froito do tempo que compartían cando adestraban.