E agora un panel con donuts para ironizar sobre a falta de investimentos en Ribadeo
RIBADEO
Ribadenses copian a idea do Concello dun valo irónico e arremeten contra todas as administracións
17 novs 2019 . Actualizado ás 19:35 h.Ao valo do Concello de Ribadeo ironizando coa achega da Xunta (simbolizada nunha bolsa de pipas co escudo oficial do goberno galego) na reforma do estadio municipal Pepe Barreira, saíulle competencia. Alguén, ignórase quen, tivo a ocorrencia de colocar un cartel criticando o nulo investimento en mellorar a estrada que, paralela á vía de Feve, discorre polo barrio dos Garitos, conectando a zona de Vilar coa estrada da Deputación en dirección a Santa Cruz. O cartel é similar ao que instalou o Concello, cunha pregunta e a resposta en forma do investimento de cada administración e unha imaxe alusiva. O que ocorre neste caso é que á Xunta, ao Concello e á Deputación correspóndelle a mesma: cero euros e un «dónut».
Esta estrada é moi transitada, singularmente por camións e vehículos agrarios, e adóitanse rexistrar numerosos accidentes por ser moi estreita, o que provoca caídas ás cunetas. Os veciños que residen na zona veñen reclamando desde hai anos que se mellore e nunha ocasión nos orzamentos do Concello de Ribadeo incluíuse unha partida para iso, pero a obra non chegou a licitarse.
O valo do estadio municipal Pepe Barreira, instalada polo Concello, foi denunciada polo PP, por serse montada en período electoral. O Partido Popular pediu que o alcalde, Fernando Suárez, fose sancionado cun multa de 300 a 6.00 euros, que está pendente de resolución. Neste caso, o valo é anónima e da pulla ninguén se libra, nin Concello, nin Deputación nin Xunta.
