Segundo algunhas testemuñas, no inmoble hai un grupo numeroso de ao redor de vinte persoas
08 may 2021 . Actualizado ás 05:00 h.A okupación dun inmoble en Marzán (Foz), nunha zona concorrida das inmediacións da coñecida como Fonte de Marzán, provocou a lóxica preocupación na veciñanza. Trátase dun grupo de familias que suman un número considerable de persoas (algunhas fontes falan de entre 10 e 20), entre as que hai menores de idade. Ao parecer, dispoñen e móvense con varios vehículos. Cada día que pasa transcenden novos datos, como que polo menos foi presentada unha denuncia no cuartel da Garda Civil de Foz pola okupación.
Lámpadas de cámping a gas
O inmoble atopábase deshabitado e carece de abastecemento de luz e auga. Iso non foi impedimento para que este grupo de xente (cuxo orixe algunhas fontes sitúan en Lugo capital) o haxa okupado, valéndose de equipos como lámpadas de cámping gas para iluminarse polas noites.
Preocupación
Tras a sorpresa inicial, tendo en conta que as okupaciones son moi pouco habituais na Mariña, algúns veciños de Marzán, sobre todo os de idade máis avanzada, expresaron a súa preocupación polo que poida ocorrer e porque se poidan estender a outros inmobles.
Con todo, hai que destacar que polo momento non se rexistrou incidente algún, máis aló da okupación. Así o confirmaron desde a asociación de veciños de Marzán: «Cónstanos que se presentou unha denuncia pola okupación. Nada máis. Nós, cando nos enteramos do que estaba pasando, falamos co alcalde, explicounos os pasos que deran e parécenos ben. O certo é que tal e como está a lei hai pouco que facer».
«Hai preocupación en xente maior, pero tampouco é esaxerada. Explicámoslles o que había e que hai que esperar. De momento non temos constancia de ningunha queixa. Os que ocuparon a casa están ó seu e, que nos conste, non molestaron a ninguén», engadiron desde a asociación veciñal.
O agardar refírese a que parece ser que hai esperanzas fundadas de que a okupación sexa provisional. De feito, este numeroso grupo de okupas, antes de entrar na casa de Marzán, xa estivo no polígono industrial de Fazouro. Tamén se comentou que foron vistos na zona do porto, preto da piscina municipal, un lugar de aparcadoiro de autocaravanas.