Estas son as medidas que expón o PP burelense para rebaixar a presión fiscal e axudar a dinamizar a economía local
BURELA
Expoñen reducir ou bonificar impostos e taxas como o IBI, a ocupación de vía ou o de construcións
01 dic 2021 . Actualizado ás 05:00 h.Reducir, eximir ou bonificar algúns impostos e taxas. Son algunhas das medidas que expón o PP de Burela na súa proposta de reforma para rebaixar a presión fiscal en 2022 e para dinamizar a economía local. Defenderaa no pleno. Avogan pola redución do tipo impositivo do IBI de urbana, pasando do 0,48 ao 0,43 %. «Isto suporía un alivio fiscal para os veciños, darredor dun 10%», aclaran. Expoñen bonificar un 50 % as cotas para a licenza en establecementos de nova implantación «así como nos procedementos das declaracións responsables ou comunicacións previas sobre ditos establecementos. E tamén a mesma porcentaxe de bonificación para a taxa por licenzas de apertura, ampliación ou reforma de negocios».
Sobre o mercado semanal, o PP propón a exención total ou a bonificación proporcional da taxa aos comerciantes ambulantes por ocupación en vía pública. Explican que «no caso de circunstancias sobrevidas de forza maior que paralicen a actividade dun negocio, o Concello debería aplicar unha exención total ou bonificación proporcional da taxa relativa á prestación de servizos pola rede de sumidoiros, saneamento, depuración de augas residuais e recollida domiciliaria de residuos sólidos urbanos; así coma do subministro de auga potable». Contemplan a redución ao 50 % da taxa por espazos nas vías para carga e descarga e a bonificación do 50 % do imposto de vehículos destinados a uso comercial.
O PP defende unha bonificación do 95 % do imposto sobre construcións, instalacións e obras «a favor daquelas nas que se incorporen sistemas para o aproveitamento térmico ou eléctrico da enerxía solar para o autoconsumo. E a mesma bonificación a favor daquelas reformas que favorezan as condicións de acceso e habitabilidade das persoas con mobilidade reducida». Instan ao Goberno a pedir a bonificación do 19 % no canon de Sogama e expoñen fraccionar os recibos da taxa de subministración de auga potable «cando se vexan incrementados por causas alleas ao titular do contrato».