Burela suxire «comer peixe, que pode reducir o risco de depresión»
06 feb 2021 . Actualizado ás 05:00 h.Acadar ese estado que o dicionario define como «de grata satisfacción espiritual e física» é unha meta á que aspira o ser humano. Ao longo dos séculos sucédense as reflexións sobre unha cuestión tan transcendental como individual porque, en definitiva, depende de como se senta mellor cada persoa. Sen entrar en tantas disquisicións filosóficas e existenciais, pero co obxectivo claro de contribuír ao benestar, a flota de Burela pregunta neste segundo ano da pandemia se «coñeces a fórmula da felicidade». Sen trampa e con resposta, para quen queira tela en conta: «P=S elevado a infinito», que significa «comer peixe é igual a saúde por sabor, elevado a infinito».
Por que? Porque «numerosos estudos relacionan determinados alimentos co noso estado de ánimo». Xa que a iniciativa procede de profesionais da pesca da Mariña, un dos camiños que propoñen é obvio: «Dise que o consumo de peixe pode diminuír ata un 17 % o risco de padecer depresión, un efecto beneficioso que podería deberse á súa riqueza en ácidos grasos Omega 3». E que teñen que ver coa felicidade? Tamén teñen explicación: os Omega 3 «modificarían a actividade de dopamina e serotonina, neurotransmisores vinculados á depresión».
«Base dunha vida saudable»
Ofrecer a súa particular «fórmula da felicidade» é a última aposta da Organización de Produtores Pesqueiros de Lugo por «promocionar o consumo de peixe como unha das principais bases dunha vida saudable». Acredítano o cardiólogo Guillermo Aldama López, o endocrinólogo Miguel Ángel Martínez Olmos, o nefrólogo Secundino Cigarrán Guldrís e a pediatra Rosaura Leis, tamén presidenta da Fundación Dieta Atlántica.
Seus son as doce mensaxes que difunden os beneficios do consumo de peixe en cada un os 3.500 calendarios do 2021 que editou Produtores Pesqueiros de Lugo, coa colaboración de Armadores de Burela. Cando a pandemia continúa azoutando sen piedade corpos e almas, os catro doutores completan a posible influencia do peixe na felicidade con evidencias sobre as súas vantaxes para a saúde.
«Un alimento anti-covid»
O nefrólogo Cigarrán defíneo como «un alimento anti-covid polo seu contido en vitamina D, Omega 3 e proteínas de alto valor biolóxico». Tamén, «en xeral, favorece a rexeneración intestinal e prevén as enfermidades inflamatorias intestinais», ademais de «axudar a manter a microbiota ou flora intestinal».
«Axuda ao sistema inmune»
O endocrinólogo Martínez Olmos sinala que os nutrientes do peixe «axudan a manter a saúde física, cognitiva, ósea, ocular, a función vascular e o sistema inmune das persoas maiores». Xunto ao marisco, é unha «fonte de yodo cuxo consumo pode axudar a previr problemas de tiroides». E «achega vitaminas do grupo B e vitaminas liposolubles que regulan o noso metabolismo, actúan como antioxidantes e axudan a manter un adecuado estado de saúde».
«Fundamental para o neno»
A pediatra Leis incide en que o peixe «debe formar parte da alimentación saudable do neno e do adolescente, con 3 ou 4 racións á semana». Os seus Omega 3 «de cadea longa favorecen o desenvolvemento neuronal e da retina no neno». Ademais «achega proteínas de alto valor biolóxico, minerais e vitaminas fundamentais para o desenvolvemento durante a infancia e a adolescencia».
«Vivir moitos anos»
E o cardiólogo Aldama resalta que comer peixe «axuda a regular os niveis de colesterol, elevando o ‘bo' ou HDL e diminuíndo o chamado ‘malo' ou LDL». Como «fonte importante de graxas e proteínas, demostrou ser a mellor opción para vivir moitos anos con boa calidade de vida». Polas súas «graxas de alta calidade», tamén o considera unha «fonte ideal para reparar e fabricar novas células, que están protexidas por un recubrimiento feito de graxa».