Bombeiros de Barreiros realizaron un simulacro na cavidade mindoniense
22 jul 2021 . Actualizado ás 05:00 h.Entre as nove da mañá e as cinco da tarde realizaron onte bombeiros do parque de Barreiros un simulacro de urxencia na Cova do Rei Cintolo, en Mondoñedo . Divididos en dous grupos e con dúas padiolas, 15 efectivos realizaron simulacións de rescates en altura e extracción de vítimas no sector central da cavidade, polo que discorren boa parte das visitas guiadas. Entre outros, os bombeiros probaron posibles puntos de ancoraxe e adestraron habilidades de espeleo socorro nun espazo confinado, con desnivel continuo e o 100% de humidade. A actividade contou co beneplácito do Consorcio de Bombeiros e o Concello de Mondoñedo. A xefatura do parque agradece a colaboración de todos os bombeiros, posto que varios acudiron no seu día libre, así como o préstamo de material do GES de Cervo , que dirixe Mario Antuña.