Sargadelos suspende de novo as operacións en produción de Cervo e a Xunta ínstalle a renovar a actividade
A MARIÑA
A dirección da empresa ordenou iniciar os trámites para «un peche ordenado por causas de forza maior» e desde o Goberno galego advirten que velarán polo cumprimento da lexislación laboral e denunciarán calquera ilegalidade
28 nov 2025 . Actualizado á 08:09 h.A dirección de Sargadelos ordenou este xoves pola mañá a suspensión das operacións na planta de produción da fábrica mariñá de Cervo. Así o confirmaron fontes da emblemática compaña de cerámica tras recibir este mesmo xoves, pasadas as dez, da mañá a tres inspectores para novas fiscalizacións e controis na referida planta.
O peche da produción afecta a un persoal que rolda os 80 empregados e parte deles aínda continuaban este mediodía ante a factoría tras ter que abandonar de forma forzosa os seus postos de traballo. Non quixeron realizar manifestacións sobre o ocorrido. Tamén se desprazou á factoría a rexedora de Cervo, Dolores García, que pouco antes das dúas da tarde continuaba no lugar á espera de recibir máis información. Varias fontes consultadas apuntan a que a inspección é rutineira e estaba xa prevista de antemán.
Desde a compaña lembran que deron orde ao seu letrado especialista en cuestións laborais para que comece os trámites oportunos «para un peche ordenado por causas de forza maior». De forma temporal e de inmediato suspenderon as operacións na planta, segundo confirmaron fontes oficiais. Alegan que como dirección non queren ser responsables nin causantes de enfermidades ou problemas de saúde entre o seu persoal por motivos laborais.
Lembran que a Xunta se comprometera a facilitar os medios e permisos para mellorar no posible os procesos de fabricación, apuntando que ata a data non comezou as obras «presuntamente necesarias». Si enviou, puntualizan, a uns expertos «que certificaron a carencia de substancias altamente patóxenas ou perigosas».
Ante esta nova situación, desde a empresa insisten en que quizais sería pertinente expropiar as instalacións e dedicalas a actividades museísticas ou de interpretación da cerámica «que seguro que non xeran partículas insalubres».
A incerteza planea de novo sobre Sargadelos e sobre o seu futuro laboral. Cabe lembrar que xa en abril o administrador único de Sargadelos, Segismundo García, comunicou por carta á Inspección de Traballo que procedía a pechar a planta de produción da factoría de Cervo «ante a dificultade para respectar e acometer a inxente normativa vixente e, dado que segundo din, a nosa saúde corre perigo». Facíao seis días despois de responder por burofax ao mesmo órgano instándoo a precintar as instalacións tras serlle notificada unha multa de 5.000 euros e 36 deficiencias.
Segismundo García Rodríguez (A Pontenova, 1951) entrou como conselleiro delegado de Sargadelos no 2008, cargo do que tempo despois dimitiu temporalmente ante a oposición de socios, traballadores e sindicatos a que fixese cambios. No 2014 foi nomeado presidente do consello de administración, incrementando progresivamente a súa participación no grupo de cerámica. No 2019 acadou o 90%. Coa cerámica como buque insignia, o administrador optou por diversificar o negocio explorando, entre outros, o mundo da xoiería ou os perfumes.
A Xunta di que cumpriu o seu compromiso e insta á dirección para renovar a actividade na planta
Mentres os traballadores da planta tiñan previsto regresar este venres ás 7.15 horas aos seus postos de traballo, aínda sen saber se poderían incorporar, desde as consellerías de Emprego, Comercio e Emigración, e Cultura, Lingua e Xuventude pronunciáronse publicamente este xoves pouco antes das sete da tarde. Nun comunicado indican que a Xunta insta de inmediato á dirección de Sargadelos a renovar a actividade «canto antes en defensa dos dereitos dos traballadores. Como autoridade laboral, o Goberno galego, como non pode ser doutro xeito, velará polo cumplimento da lexislación laboral e denunciará calquera ilegalidade que sexa detectada».
Lembran que a Xunta, desde as negociacións desde o mes de abril, actuou «con absoluta responsabilidade, mantendo un contacto permanente tanto coa empresa como coa Inspección de Traballo, e mediando para que se ofrecese a máxima flexibilidade á dirección (dentro da legalidade vixente) para a realización das obras necesarias para subsanar as deficiencias detectadas».
Desde as consellerías explican que froito daquelas xestións, Inspección de Traballo concedeu a Sargadelos «un prazo suficientemente amplo para acometer as actuacións previstas no requerimento de marzo de 2025 e no de setembro de 2024». Con respecto á inspección deste xoves á planta, desde a Xunta indican que foi unha visita rutineira para comprobar o cumprimento das actuacións solicitadas.
Defenden que colaboran co financiamento das obras tendo en conta a singularidade da planta, que foi declarada Ben de Interese Cultural (BIC) desde 2014. Sosteñen que se completaron os estudos sobre as condicións do sistema de ventilación e extracción e parte das actuacións esixidas, e apuntan que emendar «as eivas detectadas é perfectamente compatible co mantemento da actividade e permite garantir a seguridade e saúde do persoal».