Os sindicatos impugnaron o ERE e retomarán o venres as protestas cunha caravana de coches en Lugo
01 dic 2021 . Actualizado ás 21:58 h.UGT, CIG e CC OO presentaron xa a impugnación do ERE presentado por Vestas , ao apreciar mala fe negociadora da multinacional durante o período de consultas. Por outra banda, a Xunta de Galicia convocou para o 9 de decembro -12.00 horas, EGAP- a mesa industrial polo futuro da planta de Chavín.
A un mes para o 31 de decembro, data prevista para o cesamento produtivo, o PSdeG levou onte a situación de Vestas ao Parlamento, reclamando á Xunta «asumir as competencias en materia industrial». O Goberno autonómico dixo agardar que os tribunais consideren «nulo» o ERE, pois Vestas recibiu tres advertencias da autoridade laboral, entre elas pola «rapidez» en pechar a negociación.
Sobre unha venda, a Xunta acolleuse á «confidencialidade» do proceso para non concretar avances, aínda que agardou que poida frutificar unha venda similar á do antigo centro de Vestas en Villadangos del Páramo, León. «Comparar os centros é un gran erro», matiza o comité, á espera de ver se hai novidades.
Mañá, protesta en Lugo
Os traballadores retomarán protéstalas mañá, cunha caravana de coches que percorrerá o centro de Lugo, desde As Termas (12.00 horas) ata a Carballeira de Fingoi.