Hostaleiros da Mariña pregúntanse por que hai que ter «unha PCR negativa para o bar, pero non para o súper»

A hostalería dos cinco concellos da Mariña máis poboados estreará restricións este sábado co paso ao nivel alto. Por primeira vez desde o inicio da pandemia, as autoridades non obrigará ao sector a pechar o interior dos locais, pero os requisitos que deberán cumprir os clientes para acceder xeraron un gran malestar entre algúns hostaleiros mariñáns, que se mostran «moi indignados». Así estaba este mércores Domingo González, presidente de Beiras de Viveiro e propietario de tres negocios en Cantarrana. «Quen son eu para esixirlle a ninguén que me xustifique se está vacinado, se ten una PCR negativa ou se xa pasou o covid?», pregúntase. E lanzou unha reflexión: «Se a Xunta recoñeceu publicamente que unha persoa que tivo o virus ou que xa está vacinada pode contraelo de novo e ser contaxiadora, como se lle vai dar unha vantaxe para entrar nun local fronte a alguén que non o está?». Na súa opinión, a medida impedirá que, por exemplo, familias con nenos de 12 anos poidan ir a un local a comer unha pizza. Tampouco comprende que se limite a capacidade no exterior á 50% fronte ao 100% actual. «Que limiten ó 50% dentro, enténdese, pero na terraza non ten sentido», agregou. «Isto é un peche encuberto para non indemnizarnos. Quen está disposto a coller datos sanitarios de clientes? Que nos pechen con todas as da lei e nos paguen a Seguridade Social, os alugueres, os recibos...», manifestou. 

Baixa presión hospitalaria

A 30 quilómetros, o hostaleiro burelense Rubén Pinín, cualifica de «un pouco ridículas» as medidas que ten previsto aprobar a Xunta para a hostalería tras a última reunión do comité clínico. Considera ilóxico que para entrar nun establecemento hostaleiro haxa que presentar unha PCR negativa, un certificado de vacinación ou de ter superado o virus mentres que para entrar, por exemplo, nun supermercado, onde se reúne moita xente, non sexa necesario. A xuízo de Pinín, tamén hai que ter en conta que unha alta porcentaxe dos contaxiados na quinta onda están asintomáticos, polo que a presión hospitalaria, e especialmente nas uci, é baixa. González e Pinín ven perigar un verán que ata agora estaba a ser «moi bo». «Vexo as medidas un pouco ridículas. Que podas entrar no súper sen PCR nin vacina con 500 persoas e nun bar non...», reflexiona.

---

---

---