O covid impide celebrala como costume outro ano máis, pero haberá alternativas na Pontenova
01 may 2021 . Actualizado ás 05:00 h.En condicións normais, como cada primeiro de maio, A Pontenova converteríase na xornada de hoxe nun fervedoiro de xente e de amantes do mundo da pesca, debido á Festa da Troita. A popular cita que xa non se puido celebrar o ano pasado debido ao covid, afronta esta edición cunha axenda condicionada polas circunstancias e con actividades de tinguidura simbólica, para evitar concentracións de xente. Francisco Rois «Taracho», presidente do CIT explicaba onte en que vai consistir a programación deste atípico 2021: «Vamos poñer música cun altavoz por todo o pobo máis colgar entrevistas que se fixeron a pregoeiros e Troitas de Ouro (en www.radiopontenova.es). Cumprindo as normas». «Aparte, vamos colocar as dúas primeiras pedras do río, conmemorativas gravadas para recordar xente que pasou pola Pontenova e que quedarán no paseo para sempre»., engade. A ausencia da festa como tal se nota: «Económicamente afecta, porque durante os tres días o pobo estaba cheo de xente, bares, restaurantes e hoteis a tope... A Festa da Troita é moi grande, tanto para o pobo como para concellos limítrofes».
«Hai limpar ou río do Eo xa, está moi esquecido»
No contexto da Festa da Troita da Pontenova, Rois non quixo deixar pasar por alto unha crítica pública á situación na que, denuncia, está o río Eo afectando á poboación de peces migradores como a troita, o salmón e o reo: «O salmón encóntrase que tén que saltar obstáculos e é máis complicado o seu recorrido. Os salmóns que quedan arriba están desgastados e non poden baixar. Realmente é un problema moi grande que a Administración non soluciona dende hai dous meses. É vergonzoso». «Despois de facer centos e centos de quilómetros, os salmóns non van ter máis remedio que tratar de saltar esa presa porque os xestores son incompetentes», di sinalando á de Louredal en concreto. Engade que «o río está moi olvidado, deixado da man de Dios, hai moita maleza, víboras... Hai un problema xeneral pero este teñen que solucionalo xa, coller unha pala para escarvar e que os peixes podan entrar na escala». «Máis que mirar de quen é competencia a actuación, o caso é solucionar o problema», agrega Rois. «É unha pena que por desidia non se fagan as cousas ben», incide o presidente do CIT da Pontenova.