Aumentan a 27 os casos de covid no Vicedo, baixan en Xove e sobe un en Viveiro
A MariÑA
Foz e Ribadeo sumaron respectivamente un contaxio nas últimas vinte e catro horas
21 ene 2021 . Actualizado ás 11:26 h.De 21 a 27 subiron os casos de covid-19 no Vicedo en só vinte e catro horas. Así o notifica o Sergas este xoves pola mañá (con datos do mércores ás 18 horas). A situación preocupa no municipio, onde xa están en vigor as restricións de nivel máximo e onde o Sergas fará un cribado masivo este domingo, día 24, a partir das 10.00 horas.
No que respecta ao concello de Viveiro, outra xornada máis parece que tende a estabilizarse a situación. Este xoves rexístranse 267 casos (onte, 266 e antonte, 267) nun dos tres concellos galegos suxeitos xa ás restricións máximas con medidas excepcionais para intentar frear a propagación do virus.
Un dato máis positivo volve presentar Xove, onde se volveu a reducir a cifra de contagios novos diagnosticados nas dúas últimas semanas. O Sergas notifica este xoves 88 casos de coronavirus, catro menos que o mércores (o martes tiña 107). Tamén baixa dous casos Burela, pasando de 47 a 45 e un Cervo, de 24 a 23. Ourol pasa de ter dez positivos a contabilizar entre un e nove.
Os concellos ribadense e focense rexistran hoxe un contaxiado máis: Ribadeo pasou de 21 a 22 e Foz, de doce a trece nas últimas vinte e catro horas. Seguen con entre un e nove casos activos os municipios de Mondoñedo, O Valadouro, Barreiros, Alfoz e A Pontenova.
Trabada continúa sen casos novos nos últimos catorce días, nivel que abandona Lourenzá. Tras levar varias semanas sen diagnosticarse contagios, este xoves o municipio laurentino presenta entre un e nove casos.
En canto aos ingresos, o Hospital Público dá Mariña, en Burela, contabiliza 18 internados en planta por covid (un menos que o mércores). Segue sen haber pacientes en coidados intensivos por esta causa. O HULA de Lugo ten nove ingresados na uci e 19 en planta, e o hospital de Monforte, dous en planta.
A cifra de contaxiados segue subindo en toda a provincia. Este xoves xa se contabilizan 1.361 casos fronte aos 1.210 do último balance. Desde que comezou a pandemia xa se rexistraron 158 falecementos en toda a provincia, que acumula 8.708 contagios.