O corredor de Burela rematou sétimo en Bulgaria coa súa segunda marca persoal: 2:25:09
10 novs 2020 . Actualizado ás 19:53 h.Un marroquí, un kenyano, dous ruandeses, un turco, un ugandés con pasaporte búlgaro e un burelense. Así se distribuíron as sete primeiras posicións da Maratón de Varna, en Bulgaria. Simón González Río deixou pegada grazas a un ritmo infernal que lle permitiu completar os 42 quilómetros e 195 metros en apenas 2 horas, 25 minutos e 9 segundos.
Aos seus 34 anos, o corredor mariñán volve reivindicarse entre os mellores especialistas españois da longa distancia nun escenario internacional. Estableceu a súa segunda mellor marca de sempre, apenas 1 minuto e 48 segundos máis lento que en Londres 2019, a pesar de enfrontarse a un percorrido «duro»: «Eran catro voltas a un circuíto con varias subidas e unha baixada pronunciada. Pero foi bonito, pasaba polo centro peatonal da cidade, un famoso parque e logo a estrada que bordea o Mar Negro, a pé de praia».
«Ao ser varias voltas vas pasando a outros corredores, ten un compoñente social que se bota en falta ás veces. Sorprendeume positivamente o ben valado que estaba e o número de policías ou voluntarios en todos os cruces. Para ser pequeno en número de corredores está moi ben organizado», conta González Río sobre unha carreira que descubriu case por casualidade, debido ao torrente de cancelacións que provocou a pandemia en toda Europa.
Poucas competicións pola pandemia
A media de Usti nad Labem, na República Checa, e a Maratón de Sofía, foran os seus dúas primeiras experiencias internacionais tras o confinamento. «Quería facer unha maratón este ano e fun a Sofía. Tomeima con calma e ademais acabei con problemas estomacais, así que cando me enterei da de Varna decidín participar», relata sobre unha competición que reuniu a un centenar de atletas, con outros 150 na media e 200 na 10,5K.
En Bulgaria, a máscara non é obrigatoria ao aire libre, pero si tiveron que pórlla na saída conxunta dunha carreira que gañou o marroquí Youssef Sbaai (2:17:23), seguido do kenyano Duncan Koech (2:17:35) e o ruandés Jean Simukeka (2:17:50). Simón, o reputado maratoniano de Burela, chegou apenas sete minutos e medio despois desa guerra.