A poboación inmigrante case se triplicou desde principios de século
26 feb 2020 . Actualizado ás 05:00 h.Aproximadamente un de cada dez habitantes censados nos quince municipios da Mariña naceron noutros países. Eles e os seus descendentes xa forman parte esencial dunha comarca que sen os 6.000 orixinarios doutros países resentiríase aínda máis ante o declive demográfico. Por traballo na inmensa maioría de casos, orixinarios de máis de trinta países de distintos continentes elixiron o norte lucense para vivir. Latinoamericanos, europeos e africanos sobresaen no padrón oficial de habitantes, que tamén inclúe a oriúndos de nacións asiáticas.
Como pode verse no estadillo anexo, a poboación inmigrante da comarca duplicouse desde principios de século. No 2002 residían nos concellos mariñáns 2.350 cidadáns chegados doutros países, e no 2018 roldaban os 6.000. Máis de 2.500 proceden de América Latina, case 2.000 de Europa, uns 1.100 de África e máis de 400 de Asia.
Caboverdianos, romaneses, portugueses, peruanos, dominicanos, brasileiros, marroquís e indonesios suman o 60 % dos nados noutros países que se asentaron na Mariña.
Sectores como a hostalería, a pesca ou o forestal dependen en gran medida da poboación estranxeira na súa orixe pero, en moitos casos, cada vez máis mariñá de sentimento. Iso si, sen renunciar ás súas referencias culturais e sociais.