Máis de 1.500 reclamacións sanitarias recolleu a plataforma en menos de dous anos na Mariña

A Unidade Móbil de Axuda coas Reclamacións (UMAR) da Plataforma na Defensa dá Sanidade dá Mariña rexistrou máis de 1.500 reclamacións individuais e colectivas desde que comezou a funcionar, o 3 de abril de 2018. Montse Porteiro, portavoz da plataforma, recoñecía este mércores que nalgúns centros de saúde chegaron a realizar ata 300 queixas. Afirma que os servizos nos que máis demanda de reclamacións hai son os de cardioloxía (con listas de espera de máis dun ano), rehabilitación, reumatoloxía (máis dun ano de espera para consultas), pediatra de familia, logopedia, atrasos para facer resonancias no sistema público.... Destacan a gran acollida cidadá á UMAR, que se despraza por toda a comarca para atender dúbidas, e redactar e rexistrar reclamacións sanitarias.

Desde a plataforma aseguran que non baixan a garda e invitan os mariñáns a acudir á manifestación na defensa da sanidade pública galega e contra os recortes que terá lugar o domingo 9 de febreiro en Santiago (12 horas). Haberá buses desde A Mariña e os interesados en acudir poden solicitar praza ata o día 5 nos teléfonos 982 140 654, 982 581 861 e 667 052 058. "Desde a Plataforma Sanitaria da Mariña animamos a todas as veciñas e veciños da Mariña para que acudan de forma masiva a esta manifestación, pois é a única forma de parar estas políticas de recortes e desmantelamento da sanidade pública, como pasou na comarca de Monterrei, onde só un pobo unido loitando de xeito incansable logrou revertir as intención do goberno do PP de pechar os paridoiros e as urxencias pediátricas do hospital de Verín. A loita é o único camiño!", manifestaron desde a plataforma.

De forma complementaria, desde a plataforma farán varias asembleas para informar á poboación sobre a situación actual da sanidade pública na comarca. Hoxe, xoves 23, será no centro sociocultural de San Cosme (Barreiros); o 29 será no sala multiusos do Concello de Viveiro e o 31, no Centro Sociocultural de Alfoz. Todas, ás 20 horas, con entrada libre. Desde a plataforma tamén reivindican a recuperación da área sanitaria «roubada», critican as derivacións a hospitais privados e a privatización de servizos. "Nós como Plataforma Sanitaria da Mariña queremos reclamar e loitar polas eivas que seguimos a ter na comarca. Reclamamos a recuperación da área sanitaria roubada, a dotación de RMN fixa, así coma placas dentais, densitometría ósea, electromiogramas, electroencefalograma, consulta de cirurxía vascular; recuperar a implantación de marcapasos e a intervención de fimose infantil, dotación do persoal sanitario en todas as categorías e crear prazas públicas de logopedas, terapeutas ocupacionais...; rematar coas derivacións a hospitais privados de Lugo e Coruña e coa privatización de servizos (mantemento, historias clínicas, provisión de materiais….)". No que respecta ás demandas en atención primaria, reivindican: "a creación de prazas en todas as categorías en xornada ordinaria e reducción de cupos, fixándoo nun máximo de 1.250 tarxetas sanitarias e 800 en pediatría; incrementar o persoal de apoio coa incorporación de matronas, traballadoras sociais,odontólogos, hixienistas, logopedas, fisioterapeutas, terapeutas ocupacionais…; cubrir o 100 % das ausencias en todas as categorías; dúas equipas completas de enfermaría-medicina en todos os PACs e dotalos de material; recuperación do segundo TES na ambulancia de SVA da Mariña".

  

Pola súa banda, desde o Sergas aseguran que, en canto ás reclamacións rexistradas en atención ao paciente, foron 328 en 2018 e 339 en 2019.

---

---

---