O CD Foz complícase a vida tras perder por 1-2 a pasada fin de semana no Martínez Otero fronte a un rival directo, o Montañeiros, que lle iguala a puntos pero cunha dinámica totalmente diferente, saldando os seus últimos encontros con vitorias e empates, mentres o Foz encadea xa oito xornadas seguidas sen gañar, nas que só logrou dous puntos, con empates fronte ao Laracha e o Boimorto. O conxunto de Gayol necesita gañar xa e romper esta nefasta dinámica e para iso o vindeiro domingo xogarase o ser ou non ser nun envite con tinguiduras de decisivo, a pesar de que aínda queda moita tempada por diante. É así porque o Foz visitará ao Xallas, o último clasificado, que acumula catro derrotas consecutivas. Para ambos os conxuntos o partido tórnase transcendental.
E paso atrás dun Ribadeo que tiña un partido complicado en Fisterra, ante o segundo clasificado, pero que tamén se presentaba como a oportunidade propicia para, de perder o Boiro como ocorreu, situarse cuarto a un punto do segundo.
Ao Fisterra custoulle meterse no partido disputado na Ara Solis contra un rival directo na zona alta da clasificación do Grupo Norte de Preferente como é o Ribadeo. O Ribadeo mostrouse desde o principio moi forte fisicamente e plantoulle cara todo o partido.
Durante os vinte primeiros minutos, o encontro estivo moi parado, con imprecisións en ambos os lados, sen haber un claro dono. Axudoulle moito ao Fisterra abrir a lata ao fío do descanso co gol de Capelo, pois tras a continuación, os verdes xa se mostraron máis tranquilos, controlando o choque, sen pasar apuros. Así foi que pronto lograron o 2 a 0 definitivo, co tanto de Taboada, logo dunha gran xogada colectiva. Con este marcador, resultoulles doado aguantar ao rival e saír á contra. Mesmo no último suspiro tivo Makaay unha ocasión moi clara para elevar a conta nunha falta directa que se estrelou no poste. Coa súa vitoria, o Fisterra consolídase na segunda praza, con 36 puntos, mentres que o Ribadeo é quinto, con 29.
Os de Rafa Casanova xogarán esta fin de semana outro dos partidos máis atractivos da xornada, ao recibir ao Mugardos, cuarto clasificado cun punto máis que o Ribadeo.