Este mediodía enfróntase ao Valdetires na cidade departamental
06 dic 2019 . Actualizado ás 05:00 h.Tras a derrota no clásico contra o Futsi Atlético, o Peixes Rubén-Burela debe pasar páxina canto antes, pois o calendario non amaina a súa dureza. O equipo mariñán reencóntrase este venres en Ferrol coa Copa da Reina (Pavillón de Esteiro, 12 horas) no que será o primeiro nunha serie de catro partidos en seis días para Jenny Lores, Ana Romero , Peque, Luci e Jenny.
As internacionais do cadro mariñán non se perderán a cita contra o Valdetires e volverán á liga o domingo, coa esixente visita ao UA Alacante. Logo Jenny concentrarase coa selección portuguesa en Albufeira, onde afrontará un dobre compromiso ante Rusia o martes e o mércores. Tamén ese día 11 cumprirán «un soño» as outras catro burelistas antes mencionadas ao defender a España contra Xapón «en casa», no Vista Alegre. Na véspera desa cita histórica para A Mariña mídense ao mesmo rival en Marín.
Julio Delgado
Pero antes deberán centrarse no enfrontamento ante un Valdetires, de Segunda División, ao que xa derrotaron este curso cun contundente 9-1 na Copa Galicia. «Vai ser diferente; xogando na súa casa, diante da súa afección, o partido vai estar máis igualado. Aínda que temos liga o domingo imos afrontalo a lume de biqueira porque queremos seguir dando pasos nesta Copa», adianta o adestrador laranxa, Julio Delgado, motivado coa idea de revalidar a Copa da Reina nun curso no que cambia de formato.
«Un mes complicado»
Xa non só a disputan os oito mellores na liga, senón que se inicia na rolda de dezaseisavos coa participación de equipos de Primeira e Segunda.
«É un mes complicado. Vimos da derrota con Futsi, a próxima semana tamén teremos as convocatorias das nosas internacionais con España e Portugal, Cilene xa está con Brasil… Con todo isto, tratamos de que as xogadoras cheguen nas mellores condicións pensando sólo na Copa da Reina e despois, aínda que sexa no bus, tocará recuperalas para o domingo na pista de UA Alacante», engadiu o preparador salmantino.