Anima desde Burela a apostar polo traballo a bordo como unha profesión de futuro
19 novs 2019 . Actualizado ás 20:57 h.Se non o é, a escaseza de tripulantes vai camiño de converterse nun mal endémico da pesca. Nin a man de obra estranxeira cobre todas as necesidades de flotas que sen inmigrantes amarrarían. Ao mesmo tempo que os armadores proclaman a mellora das condicións de vida e traballo a bordo e dos salarios, os potenciais interesados renuncian alegando que os soldos non compensan a maior parte do ano embarcados. Noutro intento de atraer novos, a Fundación Expomar apela ao orgullo mariñeiro, a todo o que foi, é e desexa seguir sendo a pesca na sociedade e a economía de comarcas como A Mariña.
Expomar trata de contribuír á «pesca» de tripulantes desde o Centro de Coñecemento en Patrimonio Cultural Pesqueiro. Financiado a través do Grupo de Acción Local do Sector Pesqueiro A Mariña-Ortegal con 34.425 euros da Unión Europea e 6.075 da Xunta, con el reforza o seu «defensa sen concesións do sector», en palabras de Alfredo Llano, alcalde burelense e presidente de Expomar. Anima ás novas xeracións a apostar polo traballo a bordo como profesión de futuro con veteranos que explican en colexios e institutos de Burela a «extraordinaria historia» dun sector sen o cal A Mariña non se entendería nin existiría como é porque «medra a base de mareas», engade.
Para valorizar e divulgar a cultura e o patrimonio da pesca en Burela e A Mariña na sociedade, Expomar contratou á consultora Valora. En nome desa empresa, Susana Santamarina e José Manuel González, xerente de Expomar, incidiron no obxectivo de que os mozos «vexan que se pode vivir do mar e sigan vos pasos dous seus pais».
Santamarina, González e Llano presentaron o Centro de Coñecemento de Expomar ante autoridades locais de Viveiro, Foz e Alfoz, así como dirixentes de Armadores de Burela e de Produtores Pesqueiros de Lugo, entre outros profesionais vinculados ao sector pesqueiro.