Sánchez suspende a súa axenda para reflexionar se renuncia á Presidencia tras a denuncia contra a súa esposa
Juanma Marrube viu un «claro desaxuste» no criterio arbitral do partido contra o Zaragoza
A MariÑA
O adestrador do Peixes Rubén-Burela, "contento" coa actuación dos seus homes ante o Zaragoza
20 novs 2019 . Actualizado ás 20:26 h.O Peixes Rubén-Burela segue na cola de Primeira División ao non pasar do empate a dous na visita ao Vista Alegre do seu rival máis directo, o Fútbol Emotion Zaragoza. O cadro mariñán mostrou sobrada capacidade para superar ao seu rival, pero encaixou dous goles «en sete miutos malos» e tampouco acabou contento coa actuación arbitral.
«Acabamos os dous tempos condicionados por seis faltas, pero saímos vivos. Estou dobremente contento por iso e porque nos axustamos ao plan de partido, rompemos a súa liña defensiva cun xogo moi práctico e estivemos moi ben fóra dos sete primeiros minutos da segunda parte», analizou o adestrador, Juanma Marrube.
O preparador de Alfoz si se detivo esta vez a analizar a actuación arbitral: «Moitas foron faltitas, non faltas. Un compoñente do corpo arbitral pítanos 9 das 12 faltas. Iso é que hai un desaxuste do criterio arbitral».
Nos últimos instantes do duelo os colexiados expulsaron a Matamoros polas súas protestas tras sinalarlle unha man que parecía inexistente e levou aos maños ao momento de dobre penalti.
A sanción a Matamoros farase pública hoxe
O colexiado galego Martínez Torres denunciou un insulto do pivote madrileño na acta. «Entendo que o compoñente emocional xogue unha mala pasada ante unha inxustiza así», xustificou Marrube a propósito dunha acción que se produciu a segundos do final e que ademais detiña un ataque mariñán en superioridade para buscar quedar cos tres puntos.
Hoxe farase pública a sanción a Matamoros, que podería ser de tres ou catro partidos. Este sábado a partir das sete da tarde non estará no derbi contra O Parrulo na Malata.
