José e Manuel son os nomes máis frecuente entre os homes na Mariña
08 oct 2019 . Actualizado ás 05:00 h.Espello social, reflexo das modas ao longo dos anos, os nomes dos mariñáns sintonizan cos máis frecuentes en Galicia e o resto de España. Contando a toda a poboación dos quince municipios do norte de Lugo, independentemente da súa idade, os máis comúns entre as mulleres continúan sendo os tradicionais María del Carmen, María e María Dolores; mentres entre os homes destacan José, Manuel e Antonio.
De momento manda a tradición na onomástica da Mariña. Datos do Instituto Galego de Estatística confírmano. Tomando como referencia ás máis de 71.000 persoas domiciliadas en todos os concellos, roldan os 1.500 cuxo nome é José, séguenlles uns 1.400 Manuel e preto de 1.000 Antonio. Maior variedade entre as mulleres, con preto de 1.000 María del Carmen, case 900 Marías e unhas 700 María Dolores.
Os primeiros en cada municipio
O panorama xeral confírmao o particular. Por municipios, en Viveiro os máis frecuentes entre os homes son, por orde, José, Manuel, Antonio, Jesús e José Manuel; e entre as mulleres, María del Carmen, María Dolores, María, Dolores e Carmen.
En Foz predominan María, María del Carmen, Carmen, María José e María Dolores, xunto a Manuel, José, Antonio, Ramón e Jesús.
Empatan Manuel e José como os dous primeiros de Ribadeo , seguidos de Antonio, José Luis e José Manuel; e nas mulleres, María del Carmen, María, María Josefa, María Dolores e Carmen.
Similar tónica en Burela , con María, María del Carmen, María Dolores, María José e Josefa, así como con Manuel, José, Antonio, José Manuel e Jesús.
Os primeiros postos en Cervo son para Manuel, José, José Manuel, Antonio e José Antonio, e para María, María del Carmen, Dolores , María Dolores e Josefa.
María, María Carmen, Josefa, Carmen e María José abundan en Mondoñedo , como Manuel, José, Antonio, José Antonio e Jesús.
José, Manuel, Jesús, Antonio e José Antonio, os máis usuais en Xove , con Dolores , Josefa, María Carmen, María Dolores e María.
E no concello de Barreiros os máis numerosos son María, María del Carmen, María Carmen, Josefa e María Teresa , ademais de José, Antonio, Manuel, Jesús e Francisco.
José, Manuel, Jesús, José María e José Manuel figuran entre os primeiros da Pontenova, igual que María, María del Carmen, Carmen, Josefa e María Carmen.
Similares aos máis frecuentes en Lourenzá : María, María del Carmen, Josefa, Carmen e Ana María, ademais de José, Manuel, Francisco, Jesús e Antonio.
No Valadouro predominan Manuel, José, José Luis, José Manuel e Jesús, así como María Carmen, María, María Dolores, Dolores e Josefa.
María Carmen e María del Carmen son os máis numerosos en Alfoz , seguidos de Josefa, Carmen e Pilar ; e entre os homes, José Ramón, José, Manuel, José Luis e Pedro.
A José séguenlle no Vicedo Manuel, Antonio, José Manuel e Jesús; e de mulleres, Dolores , María Dolores, María, María del Carmen e Josefa.
María, María del Carmen, Carmen, Josefa e María Isabel son os máis numerosos en Trabada , xunto a Manuel, José, Jesús, José Manuel e José Antonio.
José, Manuel, José Antonio, Jesús e Ramón predominan en Ourol , igual que María, Josefa, María Carmen, María del Carmen e Dolores .
Fernández, López e García destacan como os apelidos máis comúns
O Instituto Galego de Estatística tamén recolle os apelidos máis frecuentes. De primeiro ou de segundo, o máis abundante na Mariña é Fernández: case 8.600 persoas lévano. O segundo, López, con pouco máis de 6.000. García, terceiro, con pouco máis de 5.300, seguido por Rodríguez, que roza os 5.300. González ocupa o quinto posto, con algo máis de 3.500 persoas, e Martínez, o sexto, con case 2.800. Fernández é o primeiro en todos, menos en Mondoñedo (segundo tras García); Lourenzá (despois de López); e Alfoz, (tras García).
Por orde, os primeiros en Viveiro son Fernández, López, Rodríguez, García e Martínez, e a partir do posto vinte aparecen Parapar, Méndez, Lage, Castro e Rey . En Foz os máis frecuentes son Fernández, López, García, Rodríguez e Díaz, e desde a posición vinte, Veiga, Rivas, Blanco , Neira e Moreda. E en Ribadeo , Fernández, López, Rodríguez, García e González son os máis habituais, con Amor, Rivas, Lastra, Pena e Maseda desde o lugar vinte. Burela é terra de Fernández, López, García, González e Rodríguez, e a partir do posto vinte, Gomes, Eijo, Alonso, Basanta e Casas.
Os cinco primeiros e os cinco últimos de vinte e cinco no resto de concello son os seguintes. En Cervo , Fernández, López, García, González e Rodríguez, así como Castro, Rey , Bermúdez, Quelle e Iglesias . En Mondoñedo , García, Fernández, López, Díaz, González, e Rubal, Vázquez, Varela, Carreiras e Gómez. En Xove son Fernández, Rodríguez, López, García e González, e Rego, Domínguez, Eijo, Bermúdez e Casabella. En Barreiros , Fernández, López, Rodríguez, García e Díaz, e Blanco , Freire, Bermúdez, Maseda e Soto.
Na Pontenova os máis habituais son Fernández, López, Rodríguez, García e González, e no tramo final, Lombardero, Gómez, Mourelle, Lodos e Linares. En Lourenzá , López, Fernández, Rodríguez, García e Rivas, e Ron, Martínez, Barreira, Loureiro e Terrón. No Valadouro, Fernández, García, Rodríguez, González e Díaz, e Iglesias , Otero, Expósito, Castro e Souto. En Alfoz, García, Fernández, Díaz, Paz e Fraga, e Vázquez, Pumares, Maseda, Pena e Rega. No Vicedo, Fernández, Martínez, Rodríguez, López e Vale, e Rolle, Baltar, Trasancos, Pigueiras e Timiraos. En Trabada , Fernández, Rodríguez, López, García e Díaz, e Prieto, Vázquez, Rey , Villapol e Gómez. E en Ourol , Fernández, López, García, Rodríguez, Gómez, e Pena, Gato, Fraga, Sánchez e Otero.
Sara, Noa, Mateo, Hugo e Daniel imperan nesta década, e polos anos de nacemento sábese cales estaban de moda
Proba do cambio dos tempos e das tendencias, os nomes preferidos para os nados nesta década: Mateo, Hugo e Daniel, e Sara e Noa, segundo os datos do Instituto Galego de Estatística.
Os rexistros oficiais permiten coñecer os nomes máis frecuentes por décadas. Aparecen repartidos polas tres áreas na que a Xunta divide oficial e artificialmente á comarca.
Foz, Burela, Mondoñedo, Lourenza, O Valadouro e Alfoz inscríbeos o Goberno galego na zona central da Mariña. Actualmente con pouco máis de 29.000 habitantes censados, os nomes máis habituais para as nadas na década do 2010 son Sara, Noa e Daniela; e para os nenos, Hugo, Adrián e Daniel. Do 2000 ao 2009, David, Pablo e Adrián, xunto a Lucía, María e Laura. Entre 1990 e 1999, Andrea, Sara e Alba, así como Adrián, Diego e Daniel. David, Diego e Javier estaban de moda entre 1980 e 1989, igual que María, Lucía e Cristina. De 1970 a 1979, María José, Ana María e Mónica, así como Javier, Manuel e Francisco Javier. Entre 1960 e 1969 abundaban José, José Manuel e Manuel, xunto a María José, María Carmen e María del Carmen. Antes de 1960, na área central da comarca, predominaban José, Manuel ou Antonio, e María del Carmen, María ou Josefa.
Viveiro, Cervo, Xove, O Vicedo e Ourol forman o que a Xunta chama A Mariña Occidental, agora con case 26.000 persoas censadas. Aí os nomes máis comúns para os nados entre o 2010 e o 2018 son Sara, Lucía e Julia, así como Mateo, Daniel e Hugo. Durante a década do 2000, os máis frecuentes eran David, Daniel e Hugo, xunto a Paula, Sara e María. De moda na década de 1990 estiveron Laura, Alba e Cristina, ademais de David, Alejandro e Adrián. E na de 1980, David, Iván e Alejandro, así como Lucía, María e Cristina. Na de 1970 eran habituais María José, Mónica e María Dolores, e José Manuel, Antonio e José Luis. Durante a década de 1960 predominaban José Manuel, Manuel e José, xunto a María Dolores, María José e María del Carmen. Antes de 1960 eran populares José Manuel, José e Manuel, María Dolores, Dolores e Josefa.
Pouco máis de 16.000 persoas están censadas na área oriental da Mariña, que comprende Ribadeo, Barreiros, A Pontenova e Trabada. Aí os nomes máis frecuentes na década do 2010 son Noa, Iria e Sara, xunto a Daniel, Martín e Mateo. Na do 2000, Daniel, Iván, Pablo, e Lucía, Sara e Paula. Os máis comúns na década de 1990 eran Alba, Cristina e Laura, xunto a David, Adrián e Diego. Na de 1980 imperaban Iván, David, Javier, así como María, Lucía e Vanesa. Durante a década de 1970 os máis habituais eran María José, María del Carmen, Mónica, ademais de José, José e Javier. Na de 1960 abundaban Manuel, José Manuel e Antonio, xunto a María José, María del Carmen e Carmen. E antes de 1960, neses catro municipios estaban de moda María del Carmen, María e María Josefa, así como José, Manuel e Antonio.