O Peixes Rubén Burela FS busca facer historia coroándose nesta competición
14 jun 2019 . Actualizado ás 05:00 h.O Peixes Rubén-Burela pretende facer historia durante a Copa de S. M. A Reina que arrinca este venres, cos oito mellores equipos femininos de España en liza. Na terceira vez que Vista Alegre é sede do torneo, a entidade mariñá pretende deixar unha pegada indeleble tanto no ámbito deportivo como no social. O equipo de Julio Delgado quere coroarse por segunda vez no torneo do K.O., algo que como anfitrión só fixo o Futsi Atlético no 2015.
Pero na entidade, ademais, agardan estar á altura do transcendental momento que vive o deporte feminino e axudarlle a tomar aínda máis impulso. Tras asinar o propio Peixes Rubén-Burela o primeiro convenio da historia en España, celebrarse en febreiro a Eurocopa e coa crecente implicación da Federación Española, hai grandes esperanzas na Copa da Reina . «Vai ser unha Copa inesquecible», prometen.
«En Burela trabállase moi ben, así que a organización vai ser impecable», proclamou convencida a burelista Peque, que se recuperou dunha pequena rotura no xemelgo para non faltar nun torneo que o seu equipo só gañou no 2013 e que curaría as feridas que deixou perder ante o Futsi Atlético unha apretadísima liga.
Na mesma liña que a elixida mellor xogadora de España mostráronse xa outras das estrelas que se citan en Burela. A ourensá Vane Sotelo, do Alcorcón, autora de 37 goles esta campaña, mostrábase impaciente: «Para min sempre é especial volver a Galicia, cando me decatei de que sería en Burela leveime unha gran alegría». «É un bo pavillón e alí vívese moito o fútbol sala. Vai ser unha Copa espectacular, ideal para que se acheguen moitos afeccionados», engade Mayte Mateo, a capitá do oficioso campión de Europa, Jimbee Roldán. Chegou o día, hoxe estréase o Burela FS ante o Un. Alacante. ás 20.30.