Na horta desta veciña de Alfoz seguen crecendo hortalizas xigantescas
09 oct 2018 . Actualizado ás 11:28 h.O misterio segue sen resolver. Ou, polo menos, así o parece. San Pedro de Mor, parroquia de Alfoz, cultivou fama nacional polo seu nome cando falecía Chiquito da Calzada por mor da campaña da Campofrío pedindo a Felipe VI que lle nomease Conde Mor e que espertou todo un bum mediático no municipio, ata tal punto que o propio alcalde, Jorge Val, saíu no anuncio televisivo da marca. Pero existe outra «fama» que procede desta terra e non é a primeira vez que aparecen nestas liñas as verduras xigantes que crecen como por encantamento no horto de Maricarmen Galdo Moirón (Lagoa-Alfoz, 1961). A nova hortaliza XXL que xa ten exposta nunha resistente mesa á entrada do seu restaurante, o Bar San Pedro, á vista de curiosos e clientes, aseméllase a unha especie de cabaciña. Aínda que ela, confesa: «Non sei que é. Saíu non medio dous calabacíns e aínda teño outro máis grande creo. Redondos se que vos tiven grandes pero así, longo e ancho, non me aparecera ningún antes». Unha persoa soa non pode con el. Fan falta varias para axudar a levantalo. «A ollo, creo que poderá pesar uns 50 quilos», sinala.
Que vai facer con tremenda hortaliza?, pregúntolle. «É para vos cochos», responde . E ante outra alternativa a modo de suxestión, contesta: «Bo, eu se hai quen ou quere tamén ou dou, ou agasallo».
Como xa se viu, en máis ocasións nestas páxinas, que broten verduras de tamaño extraordinario na horta de Maricarmen é algo máis habitual do que pensamos, e para mostras varias fotos nas que ela posa con eses milagres da terra labrada polas súas mans. A pregunta do millón é saber que terá o substrato, como realiza os cultivos, canto tempo dedícalle á horta, se utiliza algún abono especial... Porque algunha resposta debe de haber. A todo iso, di: «Algo de tempo á horta claro que lle dedico, pero moito non, porque lle dedico máis tempo ao bar e ao restaurante. So vou á horta é cando teño un momento libre. Téñoa ao lado dá parede do local. Tampouco sei se vos veciños tamén teñen verduras así. Ou abono que utilizo é de aquí, dá casa, de criar cochos e do galiñeiro. Non utilizo nada de abono químico. Nada. A terra se que é bastante húmida. Debe de ser iso. Hai veces que non estou tanto a iso, ata que vexo que saen grandes».
«Boto fabas, xudías, tomates, cebolas, pementos...», engade. Dentro desa gran variedade de produción hortícola doméstica, noutras tempadas chegou a ver unha xudía de máis de medio metro de longo na súa colleita: «Este ano houbo xudías de medio metro. Máis non, porque hai moita seca». E outra vez, unha cenoria de tamaño inusual aínda que non lembra a súa medida: «Non me acordo... Era moi grande». «Nabos grandes tamén saquei», engade. E ata chegaron á televisión, xunto con algúns calabazotes. «Fora con eles á galega, a Luar . Viñéranme buscar cun taxi e viñéronme traer», lembra. Cal será a próxima verdura XXL que veremos crecer na horta de Maricarmen Galdo?