«O gasoil non vai desaparecer; o que se precisa para comprar é asesorarse ben»

ANDREA ARRUÑADA / J. A.

A MariÑA

PEPA LOSADA

Aos concesionarios xa lles piden tantos vehículos de gasolina como de gasoil

22 jul 2018 . Actualizado ás 05:00 h.

Alberto Rodríguez, xerente de Automóbiles Porta Norte en Ribadeo, servizo oficial de Seat e Skoda, coincide en que o temor á prohibición dos vehículos diésel está a estenderse entre os novos compradores. «Eu creo que o diésel non vai desaparecer. O que se necesita é mellor asesoramento e prudencia», sinala. Os coches que comercializa, Seat e Skoda, non viron alterados os prazos de entrega; seguen recibíndoos entre 15 e 20 días, sempre cando sexa un modelo estándar.

«O problema cos coches diésel non está no dióxido de carbono, senón nos óxidos de nitróxeno (NOx), cuxos niveis preocupan agora mesmo, sobre todo, nas grandes cidades. Moitos compradores da Mariña viaxan a Madrid e temen non poder acceder co seu diésel», explica Alberto Rodríguez.

A pesar diso, recalca que os novos vehículos de gasoil son menos contaminantes que os de hai anos e que se fabrican de acordo ás pautas establecidas por Bruxelas; polo que recomenda seguir as indicacións dos expertos.