A Policía Nacional revela que se recuperaron case todos os obxectos que faltaron en Viveiro durante o Resu
A MariÑA
Cinco móbiles, nove carteiras e catro mochilas, así como lentes e chaves
21 jul 2018 . Actualizado ás 05:00 h.Máis de 12.000 espectadores nos sete concertos da festa de benvida e máis de 25.000 no día principal, ata un total de 81.352 nos catro días do Resurrection Fest. Todo ese público aumentou a poboación de Viveiro, uns 18.000 habitantes reais, nunha fin de semana no que tamén había outros turistas. Con toda esa multitude, case todos os móbiles, carteiras, mochilas, chaves ou lentes que faltaron foron recuperados e a maioría foron devoltos aos seus propietarios. Desvélao a Policía Nacional de Viveiro, no seu balance do despregamento da pasada fin de semana na cidade.
Detalla que no recinto de Celeiro onde se celebrou o Resu recuperáronse 5 móbiles, 2 xa entregados aos seus donos; 9 carteiras con documentación, 3 delas devoltas; 4 mochilas, todas en posesión dos seus propietarios, menos unha «relacionada co trapicheo de drogas»; así como chaves e lentes, «en parte devoltas» porque apareceron con documentos. A Policía Nacional recibiu 3 denuncias por furto ou extravío doutros tantos móbiles, e unha, que se presentou en Elxe, por unha carteira. Por consumo de drogas en lugares públicos, levantou 9 actas e incautouse de marihuana e cocaína no centro histórico. E durante todo o Resu houbo «escasas asistencias ao público por consumo excesivo de alcol e drogas, unha derivada ao hospital».
A Policía Nacional de Viveiro incide na «ausencia de incidencias destacables» durante o Resu, o que considera «o principal indicador do bo traballo policial e da colaboración entre as forzas e corpos de seguridade na prevención da delincuencia». A comisaría viveirense cuxo inspector xefe é Jesús Seco destaca as intervencións preventivas da Garda Civil controlando os accesos a Viveiro, o que tivo «un claro efecto disuasorio para a delincuencia itinerante» e da Policía Nacional na zona vella polo consumo de drogas.
Tamén considera clave o peche da avenida Ramón Canosa no tramo que discorre fronte ao Resu, o que «tivo o seu efecto disuasorio ao permitir diferenciar ao público dos que intentaban coarse para furtar ou trapichear con drogas». Do Punto Violeta montado para previr agresións sexuais indica que «permitiu a coordinación» e, ademais, subliña «que non se rexistrou ningunha incidencia».
A Policía Nacional fai fincapé en «o potencial» do posto de mando avanzado da Axencia Galega de Emerxencias, «cunha coordinación en tempo real» entre os medios públicos e privados que velaron pola seguridade durante o Resurrection Fest de Viveiro.