Dúbidas sobre quen debe dar a orde de precintar grutas e arcos das Catedrais

A falta de menos de dúas semanas para que se poña de novo en marcha o control de acceso na praia das Catedrais (do 1 de xullo ao 31 de setembro haberá un tope diario de 4.812 entradas) séguese ignorando se os visitantes poderán acceder ás covas, grutas e aos famosos arcos, o lugar máis icónico e fotografado do monumento natural. É así porque Xunta e Ministerio de Medio Ambiente parecen discrepar sobre a quen corresponde tomar a decisión.

A raíz do fatal accidente que sufriu unha moza valisoletana, Irene Baladrón Zorita, o pasado 31 de marzo, cando perdeu a vida tras golpearlle na cabeza unha pedra que se desprendeu dunha das grutas, as diferentes administracións reuníronse para decidir que medidas tomar. A mediados de maio, nunha reunión en Lugo, o coordinador do grupo de investigadores da Escola de Enxeñeiros de Camiños da Universidade da Coruña, o profesor Luis Medina, presentou o informe preliminar aos responsables das Consellería de Medio Ambiente, Costas do Ministerio de Medio Ambiente e o Concello de Ribadeo sobre as condicións geotécnicas do monumento natural. Era un estudo inicial (o definitivo apuntouse que estaría listo en outubro), pero como conclusión inicial se recomendaba evitar o tránsito polas covas, corredores e grutas porque existe o risco de desprendementos de pedras.

Á vista do informe, a Xunta pediu a Costas que prohibise o acceso a estas zonas.

Pero a resposta do Ministerio de Medio Ambiente non foi a que agardaban desde a Xunta, pois indicou que Costas non é competente para iso e que a decisión debe tomala a comunidade autónoma. Diso hai máis de dúas semanas, pero de momento a Xunta segue sen pronunciarse. Parece coma se ninguén quixese cargar coa responsabilidade e co que iso implica.

Na súa resposta, a Dirección Xeral de Sustentabilidade da Costa e do Mar, di que solicitou á Avogacía do Estado un informe sobre as competencias en materia de seguridade das persoas en zona de dominio público marítimo terrestre, de cara a dar resposta á solicitude da Xunta sobre As Catedrales. E «non somos competentes», foi a súa resposta. Non só iso, senón que responsabiliza ao Concello de «velar polo cumprimento das instrucións e normas ditadas polas Administracións competentes, debendo acordar as medidas necesarias para garantir a seguridade e salvaguardia das persoas nas zonas de uso público, podendo ser, entre outras, o peche dos accesos por cuestións de seguridade e prevención». Este argumento non convence o alcalde de Ribadeo, Fernando Suárez, que sempre sostivo que As Catedrais excede a capacidade do Concello e que só pode garantir o servizo de socorrismo.

Os ofrecementos a colaborar mantéñense á espera de ver que paso dá a Xunta

A falta de 13 días para que comece xullo, a postura do Ministerio é que corresponde á Xunta ditar as normas de seguridade na praia e ao Concello de Ribadeo facelas cumprir. E en tanto, os días pasan e nada se fai.

Chamadas á colaboración

Como vén sendo habitual, todos se ofrecen a colaborar, pero ninguén, polo menos polo momento, toma decisións. O próximo 1 de xullo, a empresa á que a Xunta de Galicia privatizou a xestión do acceso á praia comezará o seu labor, sen saberse a estas alturas que se poderá visitar nin como se xestionará o monumento natural.

En todo caso, é de supor que en cuestión de días, talvez esta mesma semana, o dilema si se aclare.

---

---

---