«Xaneiro vai seguir húmido e febreiro será frío, pode nevar ao nivel do mar»
A MariÑA
Estudou Xeografía, pero a súa paixón é o tempo, que predicir para a comarca cada semana desde fai catro anos, agora desde a páxina de Facebook Meteo Ortegal
17 novs 2023 . Actualizado ás 18:41 h.A aventura de José Manuel Sierra Pernas, Chema, como home do tempo de Ortegal comezou fai case catro anos, a través do blogue E ti que fas non Ortegal? A este veciño de Couzadoiro (Ortigueira) de 33 anos, que estudou Xeografía, apaixónalle o tempo, en especial os fenómenos adversos, e non dubidou cando compañeiros lle animaron a elaborar un prognóstico semanal sobre a comarca e compartilo en Internet. Desde mediados de xuño de 2017, a predición meteorolóxica de Chemán, como lle alcumaron algúns, pódese consultar no blogue meteortegal.blogspot.com.é (unha entrada cada xoves) ou na páxina de Facebook Meteo Ortegal (con varias publicacións semanais).
Por exemplo, para o domingo prognosticou «algún chuvasco, que tenderá a ir desaparecendo; as temperaturas descenderán, tanto máximas como mínimas; e os ventos serán do noroeste frouxos en xeral». «É difícil porque hai moitísimos factores e variables, moitos estudados e coñecidos, pero tamén moitos que se nos escapan», recoñece. Quen podía haber prrevisto a granizada que caeu a semana pasada en Couzadoiro, arrasando cos grelos? «Ningún sistema che vai predicir que vai ter esa intensidade [...], e por iso engancha, porque na meteoroloxía un máis un non son dous, sempre pasan cousas que te sorprenden», apunta.
Que ocorrerá nas próximas semanas? «Este mes vai seguir húmido e chegará o frío, en febreiro pode que neve ao nivel do mar. É imposible precisalo, pero por estatística e por como está a circulación do aire, as borrascas e os anticiclóns no hemisferio Norte, pódenos mandar unha onda de frío importante», avanza. Realiza un seguimento diario de varios modelos de consulta e interpreta os datos, ademais de analizar os rexistros das estacións meteorolóxicas da zona.
Mala memoria climatolóxica
«Temos moi pouca memoria climatolóxica, fálase de 2017 como un ano de moita seca e na serra da Faladoira [entre Ortigueira, Mañón e As Pontes] caeron 1.360 litros por metro cadrado, cando a media é de 1.560. É verdade que o ano hidrolóxico, que vai do 1 de outubro [de 2016] ao 30 de setembro [de 2017] foi máis seco do normal, recolléronse pouco máis de mil litros por metro cadrado, pero houbo anos peores sen necesidade de irnos moito para atrás», aclara. E nos últimos 30 días, na Faladoira rexistráronse 500 litros por metro cadrado, «case a metade do que é habitual nun ano». Admite que tanta concentración das precipitacións «non é boa, pero tampouco é rara; entre xaneiro e marzo de 2016 caeron mil litros».
Chema móstrase escéptico sobre o cambio climático -«sempre cambiou, hai ciclos»-; ou o impacto das emisións de dióxido de carbono -«como especie somos a peor do planeta e a nivel local si que interferimos moito, pola construción ou a contaminación na agricultura, pero o menos grave é que expulsemos CO2»-.
«E as cicloxéneses explosivas déronse sempre ao longo da historia, en todo o Atlántico, son borrascas que se forman moi rápido -explica-. O ciclón Klaus si foi excepcional [desde aquela a xente pillou medo e agora pregunta cada vez que se anuncia unha borrasca forte], pero Ana ou Bruno foron normais, pasan todos os invernos coa entrada de masas de aire frío do norte e cálido do sur, que moitas veces chocan ao pasar pola nosa latitude».