O cadro laranxa sempre gañou nas súas anteriores visitas ligueiras a casa do equipo ourensán
21 oct 2017 . Actualizado ás 05:00 h.Poucos motivos atopan os afeccionados laranxas para preocuparse pola sorte do equipo feminino do Peixes Rubén-Burela no seu primeiro derbi galego da nova tempada en Primeira División (19.30 horas. Os Remedios. TVG2). Desde o seu ascenso á elite o conxunto mariñán sempre gañou a domicilio ao Cidade das Burgas -setes visitas- e na presente campaña o rival parece máis inferior que nunca. O equipo ourensán só puido sumar un punto e marcar catro goles nas cinco xornadas anteriores.
No vestiario burelista, con todo, o partido levanta sospeitas. «Sabemos que o rival cambiou un pouco e ten algunhas baixas, pero nós non debemos despistarnos. A liga está a ser difícil para todos, con rivais moi complicados», advirte Cilene Pereira, unha das grandes protagonistas no notable arranque do equipo. A última fin de semana, sen ir máis lonxe, foi determinante na vitoria ante o Gironella cun hat-trick. «Foi unha semana de moito traballo tras sacar un partido moi difícil no que tiven a felicidade de marcar o meu primeiro hat-trick con esta camiseta. Estou moi contenta por esta primeira experiencia; agora toca seguir traballando e crecendo día a día», declarou a peche brasileira.
Tai Menezes é a única ausencia laranxa para este envite. Así, a convocatoria, á que volve Sofía, complétana Jozi, Ana Romero , Dany, Cilene, Lara, Sara Correia, Bea Mateos, Judith, Sofía e Julia Forsiuk.