Apareceu en Atlanta pero calou entre o público e as marcas aproveitaron a oportunidade
29 ago 2018 . Actualizado ás 05:00 h.O trap é un novo xénero musical que mestura equilibradamente o rap estadounidense e bases bailables e armoniosas de estilo urbano. No caso de España, este xénero vén acompañado nalgúns casos con reivindicacións e mensaxes feministas como é o caso de Bad Gyal, MissNina e máis recentemente Rosalía. Este estilo de música calou tanto entre o público que as marcas tardaron moi pouco en aproveitar a oportunidade e convertelo na nova moda.
Orixinariamente apareceu o trap en Atlanta, Estados Unidos, nos anos noventa. Nunha época marcada por un contexto social dominado polas drogas e a violencia, a xente empezou a crear un estilo de música persoal como vía de escape que aos poucos empezou a triunfar entre o público. Antes que o trap, é evidente, houbo moitos outros xéneros musicais que chegaban ao afeccionado cun tipo de estética moi establecida, como o punk, o mod, o country, o heavy, o reggae ou o rap; o trap é o único estilo que arrasou no que levamos de década, masificando así un outfit caracterizado polo aire urbanos que impregnan cada peza.
O look adoita manexar os mesmos elementos para ambos os sexos, roupa deportiva, abrigos de pelo, suadoiros, estampados tipo animal print, ouro e tatuaxes. A única diferenza é que no caso das mulleres hai que engadirlles tres complementos esenciais: as uñas xigantes, o imprescindible eyeliner e os aros XXL.
Este look tan urbano non só fraguou entre os cantantes españois, se non que tamén chegou hai pouco a megaartistas internacionais como Beyoncé, Katy Perry ou mesmo Missy Elliott.